Fokus

Zbulimi i madh për shërimin e kancerit, a gjendet ky ilaç në Kosovë?

Autori: Elvira Haxhiu 16:31 | 10 June 2022

Para disa ditësh mediat ndërkombëtare raportuan se një ilaç i quajtur ‘Dostarlimab’, po tregon rezultate pozitive në shërimin apo zhdukjen e tërësishme të kancerit kolorektal nga organizmi, apo siç njihet ndryshe si kanceri i zorrës së trashë, shkruan Gazeta Infokus.

Kjo erdhi pas një eksperimenti klinik në Shtetet e Bashkuara të Amerikës, ku 18 pacientë morën këtë medikament për rreth gjashtë muaj dhe në fund kjo metodë rezultoi të jetë e suksesshme.

Sipas New York Times ilaçi u jepej pacientëve çdo tre javë për gjashtë muaj dhe një dozë kushton hiq më pak se 11 mijë dollarë.

Ndërkaq, disa studiues që rishikuan ilaçin kanë thënë për New York Times se trajtimi duket premtues, por nevojitet një provë në shkallë më të gjerë për të parë nëse do të funksionojë për më shumë pacientë.

Por, a ekziston ilaçi Dostarlimab në listën e barnave për trajtim të kancerit në Kosovë?

Onkologu i Klinikës së Onkologjisë në Qendrën Klinike Universitare të Kosovës, Arben Bislimi për Gazetën Infokus ka konfirmuar se ky ilaç i cili është përdorur në eksperimentin në SHBA, nuk gjendet në listën e barnave për trajtim të kancerit në vendin tonë, për shkak të kostos së lartë.

Madje ai tha se është e vështire që të trajtohet ndonjë pacient në Kosovë me këtë ilaç duke qenë se kushton shumë shtrenjtë.

“Problemi në Kosovë është sepse janë ilaçe të shtrenjta, janë medikamente të shtrenjta. Këtë ilaç ne nuk e kemi në listë. Është vështirë të trajtohet dikush me këtë ilaç derisa nuk e kemi në listë për shkak të kostos së lartë”, ka thënë Bislimi.

Sipas onkologut kosovar ende nuk mund të thuhet se është gjetur kura për këtë lloj kanceri (kolorektal).

Por ilaçet të cilat në terminologjinë e onkologjisë njihen si “smart” ai i sheh si të ardhmen në këtë fushë të mjekësisë.

“E ardhmja e Onkologjisë gjithsesi se janë këto terapitë imunologjike, këto target terapitë, këto ilaçet ne i themi “smart” të cilat kursejnë organizmin”, ka thënë onkologu.

Tutje Bislimi ka njoftuar se medikamenti Dostarlimab më shumë përdoret për trajtimin e kancerit endometrial.

Ndërkaq nga Ministria e Shëndetësisë nuk kanë dhënë ndonjë detaj nëse një ilaq i tillë mund të sigurohet dhe të sillet edhe në Kosovë, megjithatë ata  kanë deklaruar se do të ishte fat për njerëzimin që provat klinike ta dëshmojnë suksesin e tij te trajtimi i kancerit të zorrës së trashë dhe rektumit.

“Do të ishte fat për njerëzimin që provat klinike ta dëshmojnë suksesin e tij te trajtimi i kancerit të zorrës së trashë dhe rektumit dhe të miratohet për përdorim te këto forma të kancerit”, thuhet në përgjigjen e MSH-së për Infokus.

Sipas raportimit të New York Times për eksperimentin, ilaçi u jepej pacientëve çdo tre javë për gjashtë muaj dhe një dozë kushton 11 mijë dollarë.

Ndërkaq, disa studiues që rishikuan ilaçin kanë thënë për New York Times se trajtimi duket premtues, por nevojitet një provë në shkallë më të gjerë për të parë nëse do të funksionojë për më shumë pacientë./Gazeta Infokus/

 

Të tjera