Fokus

VËMENDJE: Rritja e aksidenteve/ Eksperti i komunikacionit tregon shkaktarët kryesor

Autori: Samire Jaha 17:05 | 20 July 2022

Edhe pse aksidentet me fatalitet krahasuar me 6 mujorin e parë të vitit të kaluar kanë shënuar rënie prej 10%, aksidentet në përgjithësi kanë shënuar rritje prej 1.17%.

Përderisa në 6 mujorin e parë të vitit të kaluar në 47 aksidente me fatalitet, kanë humbur jetën 56 pjesëmarrës në trafik, në 6 mujorin e parë të këtij viti nga 44 aksidente me fatalitet, kanë gjetur vdekjen 50 qytetarë, shkruan Gazeta Infokus.

Eksperti i komunikacionit rrugor, Nol Dedaj, pos tjerash si shkaktar kryesor në aksidente liston edhe gjendjen e mjerueshme të rrugëve në vend.

“Gjendja e rrugëve është e mjerueshme duke marrë parasysh vjetërsinë e tyre, ku koeficienti i vrazhdësisë nuk është adekuat me shpejtësinë e kufizuar, prandaj shpeshherë ndodh që drejtuesi i automjetit vihet në lajthitje dhe vjen deri te aksidenti”, ka deklaruar Dedaj për Infokus.

Po ashtu një tjetër shkaktar të aksidenteve Dedaj liston edhe sinjalistikën e rrugëve, e që sipas tij mungesa e sinjalistikës së rrugëve është në masën 40%.

“Gjendja e sinjalizimit vertikal dhe horizontal në rrugët nacionale dhe regjionale është në gjendje të mjerueshme, 40% mungon sinjalizimi, pastaj mungesa e sinkronizimit të sinjalizimit horizontal dhe vertikal si dhe sinjalizimi që nuk i plotëson standardet e sigurisë rrugore. Drejtuesit e automjeteve në Kosovë janë lënë nën mëshirën e fatit, sa i përket sigurisë rrugore”, ka thënë ai.

Eksperti i komunikacionit po ashtu si njëri ndër shkaktarët kryesor të aksidenteve ka thënë të jetë faktori njeri.

“Shkaktari kryesor i aksidenteve është shpejtësia që vjen si pasojë e faktorit njeri”, ka shtuar Dedaj për Infokus.

Ndryshe Gazeta Infokus, ditë më parë ka raportuar për numrin e aksidenteve që kanë ndodhur vetëm për gjashtë muajt e parë të këtij viti.

LEXO EDHE: Alarmante: 50 qytetarë të vdekur në aksidente në Kosovë për vetëm 6 muaj

Policia e Kosovës për të arritur edhe më shumë siguri në tërë territorin e Republikës së Kosovës, ka lancuar e platformën digjitale “LAJMËRO POLICINË”, me të cilën u jep mundësi qytetarëve që të raportojnë rastet e kundravjatjeve në trafik.

Ndryshe Policia e Kosovës, ka apeluar tek të gjithë pjesëmarrësit në trafik që të kenë kujdes më të shtuar, të respektojnë rregullat dhe shenjat e trafikut rrugor, si dhe t’iu përshtaten kushteve të rrugës dhe atyre atmosferike, për të pasur siguri më të madhe në trafikun rrugor./Gazeta Infokus/

Të tjera