Numri i aksidenteve në Kosovë shënon rritje sidomos gjatë muajve të verës kur edhe numri i qytetarëve në vend rritet për shkak të ardhjes së diasporës në pushime, shkruan Gazeta Infokus.

E për vetëm 6 muajt e parë të vitit 2022 në Kosovë pati 44 aksidente me fatalitet ku humbën jetën 50 qytetarë.

Gazeta Infokus ka siguruar të dhëna nga Policia e Kosovës për numrin e aksidenteve dhe për shkaqet më të shpeshta të këtyre aksidenteve.

Nga Policia kanë bërë të ditur për Infokus se këto janë shkaqet më të shpeshta të aksidenteve në vend:

· Mos mbajtja e distancës 18.9%

· Mos përshtatja e shpejtësisë ndaj kushteve të rrugës/klimatike 16.3%

· Manipulimi i pasigurt me automjet (pakujdesia) 16%

· Kyçje e pasigurt në rrugë 7.5%

· Mos respektimi i përparësisë së kalimit 7.5%

Po ashtu nga policia për Infokus kanë treguar edhe dallimin me 6 mujorin e parë të vitit të kaluar ku pati më shumë të vdekur nga aksidentet.

Kështu sipas të dhënave në 6 mujorin e parë të vitit 2021 pati 47 aksidente fatale, ku prej tyre 56 persona kishin humbur jetën.

Në periudhën janar-qershor të vitit të kaluar është bërë e ditur se kanë ndodhur gjithsej 9 mijë e 244 aksidente ku prej tyre 3 mijë 403 aksidente kanë qenë me lëndime ndërsa 5 mijë 794 vetëm me dëme materiale.

Ndërsa, në krahasim me këtë vit, në po të njëjtën periudhë janar-qershor, 2022 kanë ndodhur gjithsej 9 mijë 352 aksidente ku prej tyre 3 mijë 518 aksidente kanë ndodhur me të lënduar si dhe 5 mijë 790 aksidente kanë ndodhur me dëme materiale.

Kurse në të njëjtën periudhë kohore, vitin e kaluar janë shqiptuar 218,832 tiketa, ndërsa në krahasim me vitin e kaluar këtë vit janë shqiptuar më shumë gjoba për 6 muajt e parë të vitit, duke arritur numrin në 321,594 gjoba.

E kjo pavarësisht se Policia e Kosovës po punon për vetëdijesimin e qytetarëve që të jenë të kujdesshëm në trafik.

“Policia e Kosovës çdo vit angazhohet me masa shtesë, ku në kuadër të këtyre masave në implementim është edhe Urdhri Operativ Sezona Verore 2022. Policia e Kosovës vazhdimisht bënë apele dhe kampanja vetëdijesuese ,të cilat përcillen përmes rrjeteve sociale të Policisë së Kosovës ku si kampanje e fundit ka qenë “Ardhja e bashkatdhetarëve” . Bazuar në gjendjen e sigurisë në trafikun rrugor Policia e Kosovës vlerëson se ka resurse te mjaftueshme për të ofruar siguri në trafikun rrugor për të gjithë pjesëmarrësit”, thuhet në përgjigjen e PK për Infokus.

Ndryshe nga Policia e Kosovës kanë deklaruar se kanë realizuar edhe fushatën sensibilizuese me qëllim të ngritjes së sigurisë në bashkësi “ Të kujdesemi për sigurinë”, ku kanë shpërndarë fletushka për udhëtarët në pikat kufitare e ku shumica janë ata të diasporës.

Ndërkaq disa nga kampanjat sensibilizuese që Policia e Kosovës ka realizuar këtë vit janë, fushatë- vetëdijesimi i mospërdorimit te telefonit në trafikun rrugor në Mitrovicë; aktivitete vetëdijësuese ‘Sezoni veror 2022’ në Gjilan; Policia me fushatë vetëdijësuese për qytetarët po ashtu në Gjilan, etj.

E gjithashtu Policia e Kosovës për të arritur edhe më shumë siguri në tërë territorin e Republikës së Kosovës, ka mundësuar lansimin e platformës digjitale “LAJMËRO POLICINË”, ku u ofron qytetarëve që të raportojnë raste të ndryshme që janë kundër ligjit.

Ndryshe, përveç aktiviteteve policore në këtë aspekt, Policia e Kosovës ka apeluar tek të gjithë pjesëmarrësit në trafik që të kenë kujdes më të shtuar, të respektojnë rregullat dhe shenjat e trafikut rrugor si dhe t’iu përshtaten kushteve të rrugës dhe atyre atmosferike, për të pasur një siguri më të madhe në trafik.

“Policia e Kosovës sipas planifikimeve operacionale, parasheh aktivitete të shtuara me qëllim që të parandalohen aksidentet dhe të rritet siguria në trafik. Andaj, përveç aktiviteteve policore në këtë aspekt, Policia e Kosovës APELON tek të gjithë pjesëmarrësit në trafik që të kenë kujdes më të shtuar, të respektojnë rregullat dhe shenjat e trafikut rrugor si dhe t’iu përshtaten kushteve të rrugës dhe atyre atmosferike, për të pasur një siguri më të madhe në trafik. Për të gjithë ata pjesëmarrës në trafik, e në veçanti për shoferët e automjeteve, të cilët bëjnë shkelje të ligjeve e rregullave të trafikut, do të ndërmerren masa ndëshkuese sipas ligjeve në fuqi”, thuhet tutje në përgjigjen e policisë për Infokus.

/Gazeta Infokus/

Sponsoruar