Një planifikim për atentat është bërë ndaj kryetarit të Lidhjes Demokratike të Kosovës, Lumir Abdixhiku dhe deputetëve Avdullah Hoti, Armend Zemaj dhe Arben Gashi, shkruan Gazeta Infokus.

Këtë planifikim për atentat, eksperti i sigurisë Bedri Elezi po e sheh si rrezik mjaft serioz.

Në një prononcim për Gazetën Infokus, Elezi ka thënë se kemi të bëjmë me një alarm serioz sigurie për deputetët e Republikës së Kosovës.

“Në këtë rast kemi të bëjmë me një alarm serioz sigurie për deputetët e Republikës së Kosovës si dhe zyrtarët e lartë të LDK-së, andaj mund të vlerësojmë si rrezik serioz për të apostrofuarit”, ka thënë ai.

Gjithashtu, Elezi ka thënë se lidhur me këtë rast Policia e Kosovës duhet të bashkëpunoj me Agjencinë e Kosovës për Inteligjencë (AKI) për të krijuar kushtet e sigurisë për e këtyre zyrtarëve.

Derisa ka shtuar se duhet që sa më parë të dalin para drejtësisë personat apo grupet që kanë planifikuar atentatin dhe urdhërdhënësit e tyre.

“Në rastet kur kemi informacione se qytetarë, zyrtarë apo edhe politikan të republikës së Kosovës janë të rrezikuar me jetë, atë sigurisht se policia e Kosovës duhet veproj urgjentisht për të siguruar informacionet e nevojshme për pretendime të tilla, si dhe të merren masat konform detyrave dhe përgjegjësive të policisë së Kosovës për angazhimin e mbrojtjes së afërt për zyrtarët e rrezikut”, ka thënë eksperti i sigurisë për Infokus.

Ndërkaq, sipas nënkryetarit të LDK-së, Kujtim Shala ky planifikim për atentat ka motivacion politik.

“Ka të bëj me motivacion politik. Thuhet që gjithë kjo po drejtohet kundër kundërshtarit kryesor politik. Kaq ka informata. Unë s’mund të implikojë askënd në këtë mënyrë”, ka thënë Shala.

“Njëra organizatë pretendohet se vepron në Kosova derisa tjetra jashtë Kosovës. Ajo që vepron jashtë Kosovës ka marrë përsipër të financojë ekzekutimin e këtij plani”, ka thënë tutje ai në RTV Dukagjini.

Planifikimi për atentat ndaj Abdixhikut dhe deputetëve të tjerë të LDK-së, e konfirmoi edhe Policia e Kosovës.

Zëdhënësi i këtij institucioni, Baki Kelani, ka thënë për Infokus se PK ka marrë të gjitha veprimet e nevojshme policore lidhur me rastin/kanosjen në fjalë.

LEXO EDHE: Policia e konfirmon rastin për planifikimin e atentatit ndaj Lumir Abdixhikut dhe tre deputetëve të LDK-së

“Policia e Kosovës, në këtë rast drejtoria kompetente e PK-së, ka ndërmarr të gjitha veprimet e nevojshme policore lidhur me rastin/kanosjen në fjalë.

Të gjitha veprimet e mëtejme policore do të ndërmerren në bashkëpunim dhe koordinim me organet e drejtësisë”, ka thënë Kelani./Gazeta Infokus/

Marsi sjell Magji në ETC

Sponsoruar