Fokus

Kjo është gjendja pas vërshimeve në Malishevë dhe Klinë

Autori: Leoreta Abazi 16:49 | 13 January 2021

Dhjetëra familje të komunës së Malishevës, Klinës e qyteteve tjera të vershuara një ditë më parë ende vazhdojnë të kërkojnë një kulm për të kaluar natën.

Përveç shtëpive, atyre u janë shkatërruar thuajse të gjitha pasuritë.

Reshjet e mëdha të shiut në shumicën prej qyteteve e fshatrave pamundësuan edhe lëvizjen e qytetarëve.

Por sipas të dhënave të fundit në disa prej tyre është përmirësuar gjendja, shkruan Gazeta inFokus.

Pavarësisht që në Malishevë e Klinë uji ka nisur të largohet, gjendja vazhdon të jetë e rënduar.

Zëdhënësi i komunës së Malishevës, Artan Paqarizi për Gazetën inFokus ka treguar se ende nuk kanë nxjerrë një bilanc përfundimtar për dëmet që janë shkaktuar.

“Gjendja në komunën e Malishevës është e stabilizuar ne kuptimin që niveli i ujit ka ra dhe është qetësuar situata. Ende jemi duke u marrë me vlerësimin e dëmeve dhe duke intervenu aty ku ka nevojë, në rrugët  ku ka gurë e rërë dhe baltë”, ka thënë Paqarizi.

Dëmet janë të mëdha në këtë komunë sidomos në ekonomitë familjare.

E buxhet për mbulimin e tyre nuk ka Komuna e Malishevës.

“Komuna  e Malishevës nuk ka buxhet, por ne do i drejtohemi Qeverisë dhe Ministrive përkatëse për ti kompensuar ato dëme në bujqësi, infrastrukturë dhe ekonomi familjare. Kemi edhe përkrahjen e Qeverisë e cila do të krijojë fond për kompensimin e gjitha dëmeve që janë bërë”, ka thënë zëdhënësi i komunës së Malishevës.

Edhe  drejtori i urbanizmit dhe mbrojtjen e mjedisit, në Komunën e Klinës, Lorenc Marleku ka treguar se gjendja në këtë komunë është ende e vështirësuar.

“Gjendja në komunën e Klinës është bukur keq sepse ne në vitin e kaluar kemi punuar një pjesë të lumi dhe e kemi pastruar pasi ka qenë projekt i ministrisë por në pjesën tjetër jo dhe pastaj devijoi lumi. Gjysma e qytetit ka qenë ë vërshuar në Klinë, e kemi bërë një komision dhe nesër komisioni del në vendin e ngjarjes”, ka thënë Marleku.

Ai për Gazetën inFokus ka treguar se dëme ka sidomos në pesë lokale të cilat kanë qenë të tëra të mbuluara me ujë.

Gjithashtu si në komunë  e Malishevës ashtu ende në të Klinës nuk kanë buxhet për mbulimin e këtyre dëmeve.

“Komuna nuk ka buxhet sidomos në bujqësi, ka shumë dëme bile ka ende toka të mbushura me ujë dhe nuk po mundemi me i vlerësu ato dëme. Por për përkrahje i drejtohemi Qeverisë me një shkresë për dëmet dhe pas përfundimit të vlerësimit ndahet buxheti. Ka thënë Marleku.

Sipas tij vlerësimet do të kryhen të premten, por jo në bujqësi pasi tokat janë ende të mbushura me ujë. /Gazeta inFokus/

Të tjera