Kërkesa e Shteteve të Bashkuara të Amerikës që të hiqet taksa prej 100 për qind e vendosur nga Kosova për Serbinë, ka trazuar politikën në Prishtinë.

Në një kohë kur po tentohet një normalizim i raporteve mes dy shteteve, kjo taksë po shihet shumë e dëmshme nga SHBA-ja, shkruan Gazeta inFokus.

Mirëpo, përveç qeverisë pa qëndrim të qartë rreth kësaj çështje është edhe opozita.

Natyra Kuçi, zëdhënëse në Partinë Socialdemokrate, në një prononcim për Gazetën inFokus ka thënë se në PSD akoma nuk kanë qëndrim për këtë punë.

“Jo nuk kemi qëndrim, nuk e kemi diskutuar akoma që me dal me një qëndrim zyrtar. Nuk është se është diskutuar diçka e veçantë pas kësaj që ka kërkuar SHBA”, ka thënë shkurt Kuçi për inFokus.

E më Lidhjen Demokratike të Kosovës thotë se qeveria pasi nuk i konsultoi ata, duhet të vendosë vet për këtë çështje.

“Kjo është me vendimmarrje të qeverisë. Ata nuk e kanë konsultuar LDK-në e as SHBA-në, prandaj u takon atyre që të gjejnë rrugëdalje nga kjo situatë e palakmueshme. Po të ishte LDK-ja në qeveri, fillimisht do të konsultoheshim me SHBA-të, BE-në, Gjermaninë e Britaninë së Madhe”, ka thënë për inFokus, zëdhënësi i LDK-së, Besian Mustafa.

Vendosjen e taksës, si një nga punët e rralla të mira të qeverisë, e ka konsideruar Tinka Kurti nga Lëvizja Vetëvendosje.

Ajo e ka mbështetur qeverinë që të jetë e paluhatshme në këtë vendim.

“Është i natyrshëm ky presion ndërkombëtar kur kemi parasysh presidentin i cili kokë në vete vrapon për pazare me Vuçiqin dhe vendos gjithçka në tavolinë dhe kur kemi po ashtu parasysh një ekip negociator që i bënë amnisti presidentit në aventurën e tij. Pra, joserioziteti i institucioneve të Republikës së Kosovës ka për pasojë cenueshmërinë e lehtë përmes presioneve siç është edhe rasti i taksës. Por, mos të harrojmë se edhe në rastin e Ushtrisë së Kosovës kishim fillimisht kundërshtime të mëdha, por që më pas me vendosmëri u tejkalua gjithçka. Megjithatë taksa ndaj Serbisë më shumë po sulmohet nga brenda koalicionit sesa nga bashkësia ndërkombëtare”, ka thënë Kurti për inFokus.

Taksa prej 100 për qind për Serbinë, u vendos nga qeveria e Kosovës në fund të nëntorit të vitit të kaluar.

Atë që nga fillimi e ka kundërshtuar Bashkimi Evropian, së fundmi presionet për largimin e saj janë shtuar edhe nga SHBA-të. /Gazeta inFokus/

BKT Kosova dhe Komiteti Olimpik i Kosovës nënshkruajnë vazhdimin e marrëveshjes së sponsorizimit për periudhë 10-vjeçare

Sponsoruar