Pesë persona humbën jetën në pesë aksidente që përfunduan me fatalitet gjatë muajit janar në Kosovë.

Sipas të dhënave që Gazeta Infokus ka siguruar nga Policia e Kosovës, në muajin janar 621 aksidente përfunduan me lëndime, ku të lënduar mbetën 1 mijë e 219 persona.

Duke e krahasuar me janarin e viti 2022, shifra e aksidenteve me lëndime në janarin e 2023-tës është më e lartë. Ndërkaq, kjo rritje u vërejt edhe tek numri i personave të lënduar që është për 238 më i lartë se në janar të vitit 2022.

Në bazë të të dhënave të PK-së, gjatë muajit të parë të vitit 2023 ndodhën në total 1 mijë e 549 aksidente trafiku.

Gjatë vitit që lamë pas 106 persona vdiqën në 95 aksidente që përfunduan me fatalitet.

Derisa nga aksidentet gjatë vitit 2022 të lënduar mbetën 14 mijë e 714 persona, raporton Gazeta Infokus.

Ndërsa shifra totale e aksidenteve në vitin e kaluar ishte 20 mijë e 794.

Në javët të fundit në Kosovë ndodhën disa aksidente të cilat përfunduan tragjikisht.

Më datë 22 të muajit shkurt, katër persona humbën jetën si pasojë e një aksidenti në rrugën Ferizaj-Shtime.

Nga ky aksident ku të përfshira ishin tri vetura të lënduar mbetën edhe dy persona tjerë.

“Ka ndodhur aksident trafiku në mes të tri veturave me targa vendore, deri te aksidenti dyshohet se ka ardhur kur drejtuesi i njërës nga veturat për arsye deri më tani të pa njohura, humb kontrollin mbi veturë dhe godet dy veturat tjera të cilat ishin duke lëvizur në drejtim të kundërt. Nga ekipi mjekësor në vendin e ngjarjes është konstatuar se tre viktima meshkuj  kosovarë janë pa shenja jete, ndërsa tre të lënduar tjerë janë dërguar në emergjencën e Ferizajt, ku më pas ka ndërruar jetë edhe viktima e katërt mashkull  kosovar ndërsa dy të lënduarit e tjerë janë dërguar në QKUK Prishtinë për tretman të mëtutjeshëm mjekësor”, thuhej në raportin e policisë.

Vetëm dy ditë më pas një aksident tjetër me fatalitet ndodhi në fshatin Hodonoc të Kamenicës, ku fillimisht i vdekur mbeti një 33-vjeçar.

Nga ky aksident të lënduara mbetën një grua dhe një foshnjë rreth 6 muajshe e cila vdiq një ditë më pas duke mos arriti tu mbijetojë plagëve të marra.

“Një mashkull  kosovar, ka vdekur si pasojë e plagëve të marra në një aksident trafiku në mes të dy veturave. Po ashtu gjatë aksidentit lëndime trupore kanë pësuar edhe dy femra (njëra prej tyre foshnjë 6 muajsh) bashkudhëtare me viktimën si dhe drejtuesi i veturës tjetër të përfshirë në aksident”, thuhej në raport, transmeton Infokus.

“Lidhur me rastin raportohet se me  25.02.2023 rreth orës 09:00 në QKUK-Prishtinë ka ndërruar jetë i/e aksidentuari/a-viktima femër kosovare . Me vendim të prokurorit trupi i pa jete i viktimës dërgohet ne IML për obduksion”, njoftoi policia.

Ndërkaq, ditëve të fundit Polica e Kosovës ka publikuar një kampanjë për vetëdijesimin e qytetarëve për kujdes gjatë vozitjes, si dhe ka shtuar aktivitet për parandalimin e aksidenteve në trafik./Gazeta Infokus/

Agon Gashi në mesin e 100 Liderëve të Rinj Global: Përzgjedhet në gjeneratën e vitit 2023 nga Forumin Ekonomik Botëror…

Sponsoruar