Vrasja makabër e Arlinda Zekajt në Vitomiricë të Pejës, mbrëmjen e së dielës, ka rikthyer në vëmendje përgjegjësinë e institucioneve për mbrojtjen e viktimave të dhunës në familje.

Por, derisa po kërkohet drejtësi për vrasjen e saj, raportet e Policisë së Kosovës vazhdojnë të mbushen me raste të dhunës.

Vetëm në raportet policore të 26, 27 dhe 28 tetorit, Gazeta Infokus ka evidentuar 17 raste të dhunës në familje, të raportuara në 10 komuna të Kosovës.

-Advertisement-

Gjakova dhe Prishtina kryesojnë me nga tri raste, ndërsa Fushë Kosova, Kamenica dhe Vushtrria me nga dy. Nga një rast është raportuar në Rahovec, Ranillug, Viti, Gjilan dhe Pejë.

Nga këto 17 raste, në 9 raste të dyshuarit janë dërguar në mbajtje, në 5 raste janë liruar ose rastet kanë vazhduar në procedurë të rregullt, ndërsa në 3 raste nuk është bërë e ditur masa e ndërmarrë ndaj të dyshuarve.

Në mesin e rasteve ku të dyshuarit janë liruar është edhe një rast në Fushë Kosovë, ku një burrë dyshohet se kishte sulmuar dy gra, të cilat kishin pranuar trajtim mjekësor.

Po ashtu, në Vushtrri, një burrë i dyshuar për sulm fizik ndaj një gruaje është liruar pas intervistimit, ndërsa në Gjakovë një tjetër i dyshuar për kërcënim dhe sulm fizik ndaj bashkëjetueses është liruar në procedurë të rregullt.

Në Viti, një grua dyshohet se është sulmuar fizikisht nga bashkëshorti dhe vëllai i saj, të cilët janë arrestuar dhe dërguar në mbajtje. Ndërkaq, në Rahovec, një baba dhe vajza e tij kanë raportuar dhunë të vazhdueshme psikologjike nga një familjar.

Në Pejë, më 27 tetor, një grua ka raportuar se ishte kanosur nga ish-bashkëshorti, i cili sipas Policisë ndodhej në arrati.

 

Arlinda kërkoi mbrojtje në të gjitha institucionet tri ditë para se të vritej

Këto raste vijnë në kohën kur Kosova po përballet me reagime të shumta pas vrasjes së Arlinda Zekajt, 49-vjeçares që më 22 tetor i ishte drejtuar Prokurorisë Themelore në Pejë me një kërkesë urgjente për mbrojtje.

Vetëm tri ditë më vonë, më 25 tetor, ajo u vra në shtëpinë e saj në Vitomiricë, pasi ishte kthyer nga stacioni policor, ku kishte raportuar dhunë në familje.

Për vrasjen dyshohet kunati i saj, Albert Sylaj, i cili është arrestuar mbrëmë pasi ishte arratisur.

Policia kishte deklaruar se Arlinda ishte kthyer në shtëpi me vullnetin e saj, por këtë version e kishte kundërshtuar avokatja e viktimës, Arlinda Hoxha.

Ndërkohë, janë kërkuar verifikime të veprimeve dhe mosveprimeve të institucioneve që kanë qenë të përfshira në trajtimin e rastit.

17 rastet e evidentuara nga Infokusi nuk kanë ndodhur të gjitha brenda tri ditëve, pasi disa prej tyre datojnë nga 24 dhe 25 tetori, por janë përfshirë në raportet policore të publikuara nga 26 deri më 28 tetor.

Për sot, më 28 tetor, nga ora 16:00, është paralajmëruar edhe një protestë në sheshin “Zahir Pajaziti” në Prishtinë, ku do të kërkohet drejtësi për Arlindën dhe përgjegjësi institucionale.

Arlinda kërkoi mbrojtje, por u vra. Ndërkohë, rastet e dhunës vazhdojnë të raportohen. Pyetja që mbetet është se sa po bëjnë institucionet për t’i mbrojtur viktimat para se të jetë tepër vonë./Gazeta Infokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-