Dhuna në familje vazhdon të jetë një shqetësim serioz në Kosovë. Vetëm në raportin e fundit 24-orësh të Policisë së Kosovës janë evidentuar pesë raste të dhunës në familje, ku viktimat janë gra, ndërsa të dyshuarit janë bashkëshortë, ish-bashkëshortë, partnerë apo familjarë të tyre.

Rastet janë regjistruar në Gjakovë, Pejë, Gjilan dhe Rahovec, ndërsa disa prej tyre kanë ndodhur ditë më parë, por janë përfshirë në raportin e fundit policor.

Në Gjakovë janë evidentuar dy raste të dhunës ndaj grave.

-Advertisement-

Në rastin e parë, një grua ka raportuar se është kërcënuar dhe më pas sulmuar fizikisht nga burri me të cilin bashkëjetonte. Ngjarja ka ndodhur më 25 tetor, ndërsa i dyshuari është arrestuar më 27 tetor. Megjithatë, pas intervistimit, me vendim të prokurorit, ai është liruar në procedurë të rregullt.

Në raportin e Policisë thuhet:

“Është raportuar se viktima femër kosovare është kërcënuar dhe më pas sulmuar fizikisht nga i dyshuari mashkull kosovar, me të cilën ishte duke bashkëjetuar. Viktima ka refuzuar tretmanin mjekësor. Më 27.10.2026 është arrestuar i dyshuari dhe pas intervistimit me vendim të prokurorit është liruar në procedurë të rregullt.”

Në rastin e dytë, më 28 tetor, rreth orës 00:30, një burrë është arrestuar pasi ka sulmuar fizikisht bashkëshorten e tij. Viktima ka pranuar trajtim mjekësor, ndërsa i dyshuari është dërguar në mbajtje.

“Është arrestuar i dyshuari mashkull kosovar, pasi që ka sulmuar fizikisht bashkëshorten e tij. Viktima ka pranuar tretman mjekësor. Me vendim të prokurorit i dyshuari është dërguar në mbajtje”, thuhet në raport.

Një tjetër rast është raportuar në Pejë, ku një grua ka denoncuar se është kanosur nga ish-bashkëshorti i saj.

Sipas Policisë, rasti është raportuar më 27 tetor, rreth orës 20:00, ndërsa i dyshuari gjendet në arrati.

“Është raportuar se viktima femër, është kanosur nga ish burri i saj i dyshuari mashkull kosovar. I dyshuari gjendet në arrati. Rasti është duke u hetuar”, thuhet në raportin policor.

Ndërkohë, në Gjilan, një burrë është arrestuar nën dyshimin se ka ushtruar dhunë psikike ndaj nënës së tij.

Ngjarja ka ndodhur më 27 tetor, rreth orës 18:00. Me vendim të prokurorit, i dyshuari është dërguar në mbajtje.

“Është arrestuar i dyshuari mashkull kosovar, pasi që kishte ushtruar dhunë psikike ndaj nënës së tij. Me vendim të prokurorit i dyshuari është dërguar në mbajtje”, ka njoftuar Policia.

Rasti i pestë është evidentuar në Rahovec, ku një person është arrestuar më 27 tetor, lidhur me një rast të dhunës në familje të datës 26 tetor, rreth orës 16:00.

“Lidhur me rastin është raportuar se me 27.10.2026 është arrestuar i dyshuari mashkull kosovar dhe pas intervistimit me vendim të prokurorit, është dërguar në mbajtje”, thuhet në raport.

Këto raste vijnë në një periudhë kur siguria e grave në Kosovë është kthyer në një nga çështjet më shqetësuese, veçanërisht pas vrasjes së Arlinda Zekajt në Pejë, e cila kishte kërkuar mbrojtje nga institucionet vetëm tri ditë para se të vritej./GazetaInfokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-