Fokus

Tender 16 mijë e 800 euro me i qa drutë – Komuna e Gazmend Muhaxherit jep kontratën

Autori: Gazeta inFokus 13:03 | 19 November 2026

Zakonisht, drutë për ngrohje nga institucionet blihen të përgatitura dhe të gatshme për përdorim. Por, në Komunën e Pejës, e udhëhequr nga Gazmend Muhaxheri, ka ndodhur një risi.

Aty është ndarë një shumë prej hiq më pak se 16 mijë e 800 eurosh vetëm për çarjen e druve për shkollat e kësaj komune.

Gazeta Infokus ka analizuar dokumentin zyrtar të prokurimit, kontrata me titullin “Çarja e druve për shkollat e Komunës së Pejës – Ritender” e cila është nënshkruar më 18 nëntor 2026.

-Advertisement-

Sipas dokumentit, përfitues i kësaj kontrate është kompania GAMA Consulting SH.P.K., me seli në Prizren, e cila është përzgjedhur për ta realizuar këtë shërbim.

Në këtë aktivitet të prokurimit kanë marrë pjesë dy operatorë ekonomikë, ndërsa të dy ofertat janë vlerësuar si të përgjegjshme. Oferta fituese ka qenë 16 mijë e 800 euro, ndërsa oferta tjetër ka arritur në 21 mijë e 600 euro.

Sipas njoftimit zyrtar, aktiviteti i prokurimit është iniciuar më 8 tetor 2026, ndërsa njoftimi për kontratë është publikuar një ditë më vonë. Hapja e ofertave është bërë më 30 tetor, kurse njoftimi për dhënien e kontratës është publikuar më 17 nëntor.

Kontrata është publike kornizë, me kohëzgjatje prej 12 muajsh, dhe parasheh realizimin e shërbimit në shkollat e Komunës së Pejës.

Por ajo që bie në sy është fakti se Komuna e Pejës po shpenzon 16 mijë e 800 euro vetëm për çarjen e druve, një shërbim që ngre pikëpyetje nëse do të mund të përfshihej që në fazën e furnizimit me dru për ngrohje.

Në dokumentin e njoftimit për nënshkrimin e kontratës nuk specifikohet sasia e druve që do të çahen dhe as numri i shkollave që do të përfitojnë nga ky shërbim.

Po ashtu, nga ky dokument nuk bëhet e qartë nëse Komuna e Pejës i ka blerë drutë për ngrohje të papërgatitura dhe përse është paraqitur nevoja për një kontratë të veçantë për çarjen e tyre.

Këto të dhëna ngrenë pyetje për mënyrën e planifikimit të furnizimit me lëndë djegëse dhe arsyeshmërinë ekonomike të ndarjes së këtij shërbimi në një tender të veçantë.

Gazeta Infokus do të kërkojë sqarime nga Komuna e Pejës lidhur me arsyet e këtij shpenzimi, sasinë e druve që parashihet të çahen dhe koston e përgjithshme të furnizimit me dru për shkollat e komunës./Gazeta Infokus

 

Teknologjia në kuzhinë nuk është vetëm çështje komoditeti, por edhe kohe: Njihuni me pllakën inovative me induksion Miele KM 8000!
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy