Me ardhjen e stinës së vjeshtës, ndryshimet e temperaturave dhe qëndrimi më i gjatë në ambiente të mbyllura ndikojnë edhe në shëndetin e lëkurës, duke shkaktuar tharje dhe probleme të tjera, shkruan Gazeta Infokus.

Për këtë temë ka folur dermatologia Dafina Krasniqi, e ftuar në emisionin “Doktor Plus” me Arjeta Osmani, ku ka shpjeguar se si ndryshimi i stinëve ndikon në barrierën mbrojtëse të lëkurës dhe pse është e rëndësishme të ndryshohet rutina e kujdesit.

“Çdo stinë e vitit ndikon në lëkurë. Zakonisht edhe barriera e lëkurës pëson disa ndryshime. Gjatë kalimit nga vera në vjeshtë, lëkura pëson ndryshime, sepse qëndrojmë më shumë në ambiente të mbyllura”, ka shpjeguar Krasniqi.

-Advertisement-

Sipas saj, gjatë vjeshtës lëkura ka nevojë për më shumë hidratim, prandaj produktet që përdoren gjatë verës mund të mos jenë të mjaftueshme.

“Gjatë verës përdorim kremra më të lehtë, ndërsa gjatë vjeshtës duhet të kalojmë te hidratuesit pak më të fortë, që t’i japim lëkurës hidratim dhe ta mbajmë atë sa më gjatë”, ka këshilluar dermatologia.

Krasniqi ka ngritur shqetësimin edhe për përdorimin e produkteve të fytyrës pa konsultim me dermatologun, veçanërisht atyre që reklamohen në TikTok.

Ajo ka treguar se në praktikën e saj po has pacientë me probleme të lëkurës, përfshirë rozacenë dhe dermatitin, të cilët përdorin produkte të ndryshme pa marrë këshilla profesionale.

“Kam pacientë me rozace, kam pacientë me dermatit. Shkojnë në barnatore dhe marrin diçka, ose shohin në TikTok që dikush ka bërë një reklamë dhe e blejnë produktin. Kur vijnë te ne, tashmë e kanë dëmtuar barrierën e lëkurës”, ka deklaruar Krasniqi.

Dermatologia ka theksuar rëndësinë e përshtatjes së rutinës së kujdesit me nevojat e lëkurës, duke paralajmëruar se përdorimi i produkteve të papërshtatshme mund të përkeqësojë problemet ekzistuese./Gazeta Infokus/

Për më shumë ndiqni storien e plotë:

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-