Tri ditë para se të vritej, Arlinda Sylaj Zekaj u kishte shkruar institucioneve dhe kishte kërkuar mbrojtje urgjente. Ajo e kishte parashikuar edhe vetë rrezikun që i kanosej jetës.

Më 25 tetor, 49-vjeçarja u gjet e vrarë me sëpatë në shtëpinë e saj në Vitomiricë të Pejës.

Arlinda është gruaja e tetë që humb jetën në rrethana të dhunshme ose të dyshimta në Kosovë që nga fillimi i vitit 2026.

-Advertisement-

Rastet janë regjistruar në Dragash, Podujevë, Malishevë, Prizren, Klinë, Gjilan dhe Pejë. Në shumicën prej tyre, si të dyshuar janë identifikuar bashkëshortë ose anëtarë të familjes së viktimave.

Rasti i Pejës: Kërkoi mbrojtje urgjente, tri ditë më vonë u vra

Më 22 tetor, Arlinda kishte dorëzuar një parashtresë në Prokurorinë Themelore në Pejë, ku kërkonte mbrojtje urgjente dhe paralajmëronte se jeta e saj ishte në rrezik. Në parashtresë, ajo u kishte shkruar institucioneve: “Uroj të mos jepni llogari pasi të jetë marrë jeta ime.”

Sipas raportimeve, mbrëmjen e vrasjes ajo ishte intervistuar nga Policia lidhur me dhunën në familje dhe ishte kthyer në shtëpi nga zyrtarët policorë pak para ngjarjes. Si i dyshuar për vrasjen është identifikuar kunati i saj, Albert Sylaj. Rasti është nën hetim.

Rastet e tjera gjatë vitit

Janar, Dragash: Më 21 janar, në fshatin Restelicë, një grua rreth 60-vjeçare me inicialet T.B. u gjet pa shenja jete brenda shtëpisë së saj. Si i dyshuar u arrestua në vendngjarje djali i saj, Ferzidin Boza, rreth 30 vjeç. Rasti u iniciua si “vrasje e rëndë”.

Mars, Podujevë: Më 23 mars, në fshatin Majac, një incident me armë zjarri la disa viktima. Ilaz Brahimi, rreth 43–45 vjeç, u gjet i vdekur në vendngjarje, ndërsa Ardita Gashi, rreth 30 vjeç, dhe Miradije Gashi, 68 vjeç, u plagosën rëndë dhe më vonë ndërruan jetë. Rrethanat dhe motivi janë ende nën hetim.

Gusht, Malishevë: Më 24 gusht, Jetlira Foniqi Bytyqi, 25 vjeç, ndërroi jetë në QKUK pasi u plagos me armë zjarri. Ajo ishte në javën e 34-t të shtatzënisë. Si i dyshuar u trajtua Egzon Bytyqi, ndërsa arma, sipas raportimeve, i përkiste babait të tij. Rasti u cilësua “vrasje e rëndë”.

Gusht, Prizren: Më 26 gusht, një grua 80-vjeçare me inicialet L.D. u gjet e vdekur në shtëpinë e saj. Ekzaminimet fillestare ngritën dyshime për lëndime nga dhuna fizike. Për rastin u arrestua bashkëshorti i saj, Bardhi Dushi, 81 vjeç. Rasti u cilësua “vrasje e rëndë”.

Tetor, Klinë: Më 6 tetor, Zoje Zeneli nga fshati Poterq i Epërm ndërroi jetë në QKUK, pas afro një muaji trajtimi për lëndimet e marra në një incident më 6 shtator. Në të njëjtin incident u lëndua edhe Ganimete Zeneli. Si i dyshuar është raportuar Berat Zeneli. Pas vdekjes, rasti u ricilësua si “vrasje e rëndë”.

Tetor, Gjilan: Më 9 tetor, në fshatin Livoç i Ulët, nga të shtënat me armë zjarri humbën jetën Nafije Bogujevci, 27 vjeç, dhe vëllai i saj, Egzon Bogujevci, ndërsa Mazllum Bogujevci mbeti i plagosur. I dyshuari, bashkëshorti i Nafijes, Valon Ramushi, u vetëdorëzua në Polici. Arma u sekuestrua.

Vetëm në muajin tetor janë raportuar tri raste, ndërsa në gusht dy raste ndodhën brenda dy ditëve. Këto ngjarje kanë rikthyer në vëmendje çështjen e dhunës në familje dhe të mbrojtjes së grave që raportojnë kërcënime.

Vrasja në Pejë ka ngritur veçanërisht pyetjen se si u trajtua kërkesa e viktimës për mbrojtje urgjente dhe çfarë masash u morën pas denoncimit të saj. Ndërsa hetimet për disa nga rastet vazhdojnë, mbetet të sqarohet nëse institucionet kishin paralajmërime të mëhershme dhe nëse u ndërmorën masat e nevojshme për parandalimin e tyre./GazetaInfokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-