Arlinda Zekaj, 49-vjeçarja që u vra të dielën në Vitomiricë të Pejës, kishte kërkuar ndihmë nga institucionet edhe përmes një letre drejtuar kryetarit të Gjykatës Themelore në Pejë.

Në letrën e saj, ajo kishte shprehur shqetësime për mënyrën se si po trajtohej rasti i saj dhe kishte kërkuar që zëri i saj të dëgjohej.

Tashmë është publikuar edhe letra e shkruar me dorë nga Arlinda Zekaj, e cila u vra më 25 tetor, sipas raportimeve nga kunati i saj, me sëpatë.

-Advertisement-

Në dokumentin e titulluar “Reagim në përgjigjen e kryetarit”, ajo shprehte pakënaqësinë me trajtimin institucional dhe vendimet gjyqësore.

“Rastet nuk qenkan të pastësishme! Tani e shoh a kontribuojnë institucionet në vrasjen e grave”, kishte shkruar ajo.

Në letër, Zekaj përmend edhe takimin me gjyqtarin, për të cilin thotë se nuk kishte marrë përgjigje konkrete.

“Ju jeni njoftuar me kohë. Takimi me gjyqtarin, pa sqarime konkrete, është zero!”, thuhet në letrën e saj.

Ajo kishte kritikuar edhe vendimet gjyqësore, duke pretenduar se nuk po merreshin parasysh faktet dhe rrethanat e rastit të saj.

“Fakte ligjore janë tejkaluar dhe ligji e kompetenca e gjyqtarit nuk mund të zëvendësohen me fjalën ‘mundësi’!”, kishte shkruar Zekaj.

Në një pjesë tjetër të letrës, ajo shpreh zhgënjimin me trajtimin që pretendonte se kishte marrë nga drejtësia.

“Gjykatësi i juaj lëshon vendim kontradiktor e bën të vështirë jetën e një gruaje dhe jep urinë e një fëmije”, thuhet ndër të tjera në dokument.

Në fund, Arlinda kishte lënë një mesazh që, pas vrasjes së saj, merr një peshë edhe më të rëndë.

“As vrasjes time nuk pres të përgjigjeni – por pres të mund të flas!”, kishte shkruar ajo.

Letra përfundon me kërkesën që të merren parasysh shqetësimet e saj dhe të arsyetohen vendimet e gjyqtarit.

Ky dokument ngre pyetje për mënyrën se si janë trajtuar ankesat e saj nga institucionet e drejtësisë dhe nëse shqetësimet që kishte ngritur janë shqyrtuar me seriozitetin e duhur.

Megjithatë, nga përmbajtja e kësaj letre nuk mund të përcaktohet nëse ajo lidhej drejtpërdrejt me rrezikun që i kanosej jetës së saj, apo cilat veprime konkrete janë ndërmarrë nga gjykata pas pranimit të saj.

Arlinda Zekaj u vra më 25 tetor në Vitomiricë të Pejës, ndërsa rrethanat dhe përgjegjësitë për rastin mbeten çështje për hetim nga organet kompetente./Gazeta Infokus 

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-