Pas deklaratës së kryeministrit në detyrë, Albin Kurti, i cili tha se nuk ka krisje të raporteve me Shtetet e Bashkuara të Amerikës dhe se këtë çështje po e zmadhon opozita, ka reaguar deputetja e PDK-së, Ganimete Musliu.

Ajo e akuzoi Kurtin se e ka futur Kosovën në një qorrsokak të thellë institucional dhe diplomatik, duke e bërë atë përgjegjës për krizën e gjithanshme në vend.

Në një deklaratë për Gazetën Infokus, ajo tha se lojërat me fjalë dhe propaganda ditore nuk mund ta fshehin më gjendjen reale.

-Advertisement-

“Albin Kurti e ka futur Kosovën në një qorrsokak të thellë institucional dhe diplomatik. Kjo është e vërteta e hidhur, të cilën nuk mund ta fshehin më lojërat e tij të fjalëve apo propaganda ditore. Me apo pa qëllim, Kurti po i realizon në praktikë strategjitë e projektit serbomadh të Akademisë së Shkencave të Serbisë dhe për këtë, një ditë do të mbahet përgjegjës,” tha Musliu.

Ajo theksoi se opozita ka qenë e matur dhe konstruktive, duke paralajmëruar vazhdimisht për pasojat, por se Kurti nuk e ka merituar këtë konstruktivitet.

“Për pesë vite me radhë, ne kemi informuar opinionin, kemi paralajmëruar për rrëshqitjet e rrezikshme dhe kemi mbajtur një qëndrim institucional. Por Albin Kurti nuk e ka merituar konstruktivitetin tonë. Nëse ai ka zgjedhur konfrontimin, përçarjen dhe degradimin institucional si stil të qeverisjes, atëherë duhet të përballet me të njëjtat mjete që vet i ka kthyer në normë politike,” shtoi ajo.

Musliu tha se sot Kosova gjendet në një krizë institucionale, kushtetuese, diplomatike dhe ekonomike, për të cilën ka vetëm një adresë.

“Për këtë gjendje ka një emër dhe një adresë: Albin Kurti dhe kabineti i tij qeveritar. Në çdo shtet demokratik, politikanë që minojnë themelet e rendit kushtetues, që përçajnë partnerët ndërkombëtarë dhe që keqpërdorin pushtetin në këtë mënyrë, do të përballeshin me drejtësinë. Jam e bindur se edhe në Kosovë kjo ditë do të vijë,” u shpreh ajo.

Deputetja e PDK-së shtoi se mbrojtja e Kosovës është përgjegjësi e të gjithëve, jo vetëm e opozitës, duke paralajmëruar se heshtja e sotme mund të ketë pasoja të rënda nesër.

“Kosova është çliruar dhe ndërtuar me shumë mund, gjak dhe sakrificë. Nëse sot zgjedhim të heshtim, nesër mund të jetë shumë vonë. Shpresoj dhe besoj që qytetarët e Kosovës nuk do të bien më pre e mashtrimeve të një njeriu që, nën petkun e patriotit, po e shkatërron themelet e shtetit dhe po e rrënon reputacionin ndërkombëtar të Republikës së Kosovës,” përfundoi Musliu.

Kujtojmë se javën që shkoi Departamenti Amerikan i Shtetit mori vendim për pezullimin e Dialogut Strategjik me Kosovës duke theksuar se arsye për këtë ishin konkretisht veprimet e qeverisë Kurti.

Ky vendim nxiti reagime të shumta derisa nga qeveria deklaruan se i “mirëpresin kritikat kur ato janë konkrete”./Gazeta Infokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-