“Jam detyruar të shkoj dy herë në kioskë për me e ble mujoren pasi që njëherë më kanë thënë që nuk ka, e mandej kur kam shku herën e dytë ka qenë ora përafërsisht 6 pasdite më kanë thënë se ka ama vetëm po i shesim pasdite”.

Kështu është shprehur një studente e Universitetit të Prishtinës, D.A, e cila udhëton pothuajse çdo ditë me trafikun urban e që po përballet me probleme për nxjerrjen e biletës mujore e cila për studentë dhe nxënës kushton 12 euro për gjithë muajin.

E me problemin e njëjtë për nxjerrjen e kësaj bilete ka hasur edhe studentja tjetër, S.J.

-Advertisement-

“Kur kam shkuar në kioskën mbrapa teatrit, afër komunës së Prishtinës ku edhe mund të blesh biletën mujore për trafikun urban, herën e parë më kanë thënë që nuk ka. Duke qenë se unë edhe punoj e kisha të pamundur të shkoj përsëri. Herën e dytë e kam dërguar motrën, të cilës i kanë thënë se bileta të tilla shiten vetëm pasdite”, ka deklaruar S.J.

Mirëpo kjo studente pavarësisht se iu dashtë të humbte ditën e saj, këtë biletë e bleu në pikën tjetër të shitjes.

“Në të njëjtën ditë motra ime ka provuar që këtë biletë ta blejë në pikën tjetër të shitjes, që gjendet në rrugën “Kodra e Diellit”, e aty i kanë thënë që patjetër që këto bileta shiten edhe paradite. Mirëpo kanë treguar se kanë mungesë të tyre e pasdite i dërgojnë edhe në pikën tjetër”, është shprehur S.J.

Gazeta Infokus ka kërkuar përgjigje në lidhje me këto probleme me të cilat po përballen studentët për nxjerrjen e biletës mujore edhe nga Trafiku Urban i Prishtinës, të cilët kanë theksuar se biletat shiten në çdo orar të punës.

“Biletat mujore të gjitha llojet shiten çdo kohë në këtë orar, mund të blihet në pikat e shitjes: -Kioska me logo “Trafiku Urban”, prapa Objektit të Komunës (tek “Plepat”), orari i punës e hënë – e premte 07:00 – 20:00. Të shtunave: 09:00 – 13:00 – Kioska me logo Trafiku Urban, në lagjen Kodra e Diellit tek (Banesat e Bardha), çdo ditë nga e hëna deri të dielën sipas orarit te punës 06:00 – 22:00”, thuhet në përgjigjen e tyre.

Ndërsa nga Komuna e Prishtinës nuk janë interesuar të kthejnë përgjigje në lidhje me këtë çështje deri në momentin e publikimit të këtij teksti.

Ndryshe bileta mujore e integruar për nxënës ose student kushton 12.00 Euro ndërsa po e njëjta biletë për qytetarët tjerë është 14€/muaj.

Po ashtu kjo biletë integruese përdoret për të gjitha linjat e autobusëve të Trafikut Urban në kryeqytet./Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-