Në Kosovë, sot është hapur zyrtarisht fushata për zgjedhjet lokale të 17 tetorit. Dikush ka zgjedhur të bëj fushatë, e dikush e ka lënë për pesë ditët e fundit, shkruan Gazeta Infokus.

Por ndryshe nga të gjithë është duke vepruar kandidati i Lëvizjes Vetëvendosje për kryetar të Prishtinës, Arben Vitia. Ai vazhdon të jetë ministër i Shëndetësisë, detyrë të cilën ka thënë se do ta kryej me përkushtim deri në ditën kur të shkarkohet nga kryeministri, Albin Kurti.

Pavarësisht se çfarë bëjnë kundërkandidatët e tij, Vitia është zotuar se nuk do të flas për fushatë zgjedhore për aq kohë sa do të jetë pjesë e kabinetit qeveritar.

-Advertisement-

“Unë s’kam folur dhe as s’kam postuar as edhe një herë për garën time për kryetar të kryeqytetit. Në asnjë sekondë unë s’kam bërë asnjëherë fushatë, siç jeni edhe ju dëshmitarë. I gjithë koncentrimi im është vetëm Ministria e Shëndetësisë dhe luftimi i pandemisë…Kjo është hera e parë që po e zgjasë kaq shumë, por do të jetë edhe hera e fundit që flas për garën zgjedhore, natyrisht derisa kryeministri do të vendos të më zëvendësoj”, ka deklaruar publikisht Vitia në fund të muajit të kaluar, në një konferencë për media.

Por këtë premtim Vitia e theu të mërkurën, një ditë përpara se të fillojë zyrtarisht fushata zgjedhore.

Pavarësisht insistimit se nuk dëshironte të fliste për fushatë, Vitia krejt në fund të intervistës dhënë një mediumi vendës, jep një zotim si kandidat për kryetar të Prishtinës.

Vitia premton se do të siguroj barazi gjinore 50 me 50.

“Çdo punë e imja do të jetë në sigurimin e barazisë gjinore 50 me 50 në çdo vend të punës. 50 me 50 për qind që të respektohet barazia gjinore që të jepet shans e barabartë, natyrisht në bazë të profesionalitetit, në bazë të kredibilitetit edhe në bazë të përkushtimit që do ta sigurojnë në punë”, ka thënë Vitia.

Ai ka thënë se do ta mbaj këtë premtim ashtu siç i ka mbajtur edhe premtimet e mëhershme, duke harruar se sapo e kishte shkel një premtim- atë të heshtjes për fushatë zgjedhore në kohën sa është ministër. /Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-