Kriza shëndetësore nuk duhet të jetë një temë afatgjate në agjendën qeveritare, për arsye se Kosovën e presin ditë edhe më sfiduese në planin e rikthimit të shtetit të së drejtës, në vendosjen e rendit në shumë institucione e departamente, të cilat një kohë të gjatë kishin funksionuar mbi bazat e meritave partiake e jo profesionale si dhe në konsolidimin e shëndetësisë, arsimit e çështjeve të sigurisë.

Nga Mehmet PRISHTINA

Përballja me krizën shëndetësore, e shkaktuar nga pandemia globale Covid-19 dhe hartimi i një strategjie konkrete për rimëkëmbje ekonomike, janë dy nga prioritetet e shumta të Qeverisë Kurti 2. Qytetarët kanë pritje të shumta, kurse emergjenca vazhdon të dominojë mbi nevojat tjera, të cilat presin të marrin udhën e operacionalizimit posa të përfundojë pandemia.

Situata momentale me vaksinat është dëshpëruese. Presidentja e Komisionit Evropian, Ursula von der Leyen ka reaguar pasi u raportua se në Kosovë, nuk do të vijnë vaksina antiCOVID. Ajo thotë se së shpejti do të arrijë vaksinat e financuara nga Bashkimi Evropian në Kosovë dhe shtetet e tjera të Ballkanit Perëndimor dhe njoftoi se ka biseduar me kryeministrin e Kosovës, Albin Kurti si dhe me liderët e vendeve të tjera të Ballkanit Perëndimor, të cilëve u ka thënë se BE-ja është “pranë partnerëve tanë në Ballkanin Perëndimor”, për ta tejkaluar pandeminë e koronavirusit.

Ndërkohë, Organizata Botërore e Shëndetësisë deklaroi se vaksinat anti-Covid do të dërgohen në Kosovë brenda tri javëve.

Mossigurimi i vaksinave në Kosovë erdhi për shkak të vonesave të shumta në krijimin e një mekanizmi të mirëfilltë menaxhues, në kohën kur pothuajse të gjitha shtetet në rajon kanë filluar vaksinimin.

Në Shqipëri ka kohë që kanë arritur kontingjentet e vaksinës së Pfizer, kurse në prill pritet të arrijë kontingjenti i parë i 360.000 dozave të vaksinës së kompanisë britanike, AstraZeneca dhe Universitetit të Oxford-it.

Edhe Maqedonia e Veriut po ashtu ka filluar vaksinimin me vaksinat e dhuruara nga Serbia, kurse Serbia tashmë u ka mundësuar qytetarëve të vetë të zgjedhin në mes katër vaksinave dhe ka vaksinuar mbi një milion njerëz.

Vaksinimi ka filluar edhe në Malin e Zi dhe në Bosnje e Hercegovinë, po ashtu me vaksina të dhuruara nga Serbia.

Për dallim nga Kosova e cila është në pritje të vaksinës së AstraZenecas përmes programit të Organizatës Botërore të Shëndetësisë, COVAX, që ka për qëllim të shpërndajë vaksina në vende të varfra, disa nga shtetet e rajonit kanë bërë negociatat të drejtpërdrejta  me kompanitë për të siguruar vaksinat.

Tani, nuk ka hapësirë që të analizohen shkaqet e këtyre defekteve në mosfurnizimin me vaksinat. Kjo ishte edhe arsyeja pse qytetarët më 14 shkurt u përcaktuan për një opsion tjetër qeverisës, me shpresë që edhe kriza shëndetësore të ketë një trajtim krejt tjetër, i bazuar në plan konkret operativ dhe në veprime konkrete për të siguruar vaksinën e shumë kërkuar.

Një popullatë e vaksinuar, paraqet siguri dhe mirëqenie për jetën kolektive të njerëzve, si në planin shëndetësor, ashtu edhe ekonomik e social. Prandaj, një prej prioriteteve kryesore të Qeverisë së porsazgjedhur është hartimi një plani konkret që do të zbuste pasojat e pandemisë, sidomos në shtyllat kryesore të funksionimit të shoqërisë, siç janë ekonomia dhe ruajtja e standardit të qytetarëve.

Kriza shëndetësore nuk duhet të jetë një temë afatgjate në agjendën qeveritare, për arsye se Kosovën e presin ditë edhe më sfiduese në planin e rikthimit të shtetit të së drejtës, në vendosjen e rendit në shumë institucione e departamente, të cilat një kohë të gjatë kishin funksionuar mbi bazat e meritave partiake e jo profesionale si dhe në konsolidimin e shëndetësisë, arsimit e çështjeve të sigurisë.

Kryeministri Albin Kurti në ekspozenë e tij që ishte një sinopsis i programit qeverisës, paralajmëroi disa veprime konkrete që pritet të ndodhin, sepse kjo ishte edhe kërkesa e votuesve, të cilët presin që Kosova të shënojë një kthesë pozitive në dinamikën e ndryshimeve, si në aspektin substancial, ashtu edhe në atë konceptual.

Parasëgjithash , njerëzit kërkojnë punë dhe drejtësi. Pa punë dhe drejtësi, njeriu mbetet jo vetëm larg të qenit dinjitoz, por edhe larg vendlindjes, sepse mungesa e perspektivës zhvillimore dhe drejtësia e kapur, janë dy nga biletat e sigurta që iu japin njerëzve udhë njëkahshe.
Mbi malin e lartë të nevojave e kërkesave, Qeveria Kurti 2 mund të ngjitet vetëm duke përdorur mjeshtërinë e alpinistëve të sprovuar, të cilët kokën e mbajnë më pak te poshtë e më shumë te lartë, sepse kjo iu siguron atyre më tepër garancë për të mbërritur në cakun e dëshiruar, ku zakonisht vendoset edhe flamuri i triumfit. Tani për tani ai cak është shumë larg, por për një qeveri të përgjegjshme të gjitha pengesat janë të menaxhueshme.

Prishtinë, 28 mars, 2021

E treta e verteta, shpallet fituesi I trete I Lojes Shperblyese se Artmotion?

Sponsoruar