Plot 11 mijë e 825 metra katrorë tokë bujqësore në Fushë Kosovë janë shitur nga Agjencia Kosovare e Privatizimit (AKP) për vetëm 6.40 euro metri katror.

Blerësi i kësaj prone është Shaip Kutllovci, i cili për gjithë sipërfaqen ka paguar vetëm 75 mijë e 680 euro.

Sipas dokumenteve zyrtare të AKP-së për vitin 2025, të siguruara dhe analizuara nga Gazeta Infokus, kjo pronë është shitur përmes procedurës së shitjes direkte.

-Advertisement-

Nga përllogaritja e sipërfaqes dhe vlerës së përgjithshme të shitjes rezulton se një metër katror tokë është shitur për 6 euro e 40 cent.

Pra, një sipërfaqe prej mbi 1.18 hektarësh tokë bujqësore në Fushë Kosovë ka kaluar në pronësi të blerësit për më pak se 76 mijë euro.

Kjo është një nga shitjet me sipërfaqen më të madhe të identifikuara nga Gazeta Infokus gjatë analizimit të dokumenteve të AKP-së për vitin 2025 me çmime të tilla.

Shitja e kësaj sipërfaqeje për 6.40 euro metri katror ngre pyetje për mënyrën e përcaktimit të çmimit dhe kriteret mbi të cilat është miratuar shitja direkte e tokës bujqësore.

Derisa në Komisionin për Buxhet bordi I AKP-së dhe drejtorët e saj mundoheshin të arsyetonin shitjet e lira me atë se në to kanë qenë të ndërtuara prona dhe nuk ka pasur zgjidhje tjetër përpos të shiten në këtë formë, 11 mijë metrat katror në Fushë Kosovë janë tokë bujqësore.

Dhe vlera e saj është përcaktuar të jetë vetëm 6.40 cent për metër katror.

Por kjo nuk është prona e vetme që AKP-ja ka shitur me çmime të tilla gjatë vitit 2025.

Në një hulumtim të publikuar më 21 tetor, Gazeta Infokus zbuloi se gjatë vitit 2025 janë realizuar gjithsej 54 shitje direkte, që përfshijnë 62 mijë e 934 metra katrorë prona, me një vlerë të përgjithshme prej rreth 2.15 milionë eurosh. Në mesin e tyre janë evidentuar prona të shitura për vetëm 4 euro metri katror, ndërsa çmimet e shitjeve të tjera arrijnë deri në qindra euro, varësisht nga lokacioni dhe kategoria e pronës.

Ndër rastet e evidentuara është edhe shitja e mbi një mijë metrave katrorë tokë në Turiçec, për të cilën blerësi Agim Berisha ka paguar 4 mijë e 492 euro. Po ashtu, në Rakosh të Istogut, Skender Jahajt i janë shitur 59.5 metra katrorë për vetëm 238 euro. Në të dyja rastet, çmimi rezulton të jetë 4 euro metri katror. Ndërkohë, edhe në Magurë të Lipjanit janë evidentuar dy shitje të tjera me çmim rreth 6.40 euro metri katror.

Për sigurimin e dokumentacionit të këtyre shitjeve, Gazeta Infokus ishte detyruar t’i drejtohej Agjencisë për Informim dhe Privatësi, pas vështirësive për të siguruar qasje në dokumentet e AKP-së./Gazeta Infokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-