Pacientja ka treguar se ishte përballur me kufizime të papritura në ecje dhe gjendje të rënduar shëndetësore, për çka i ishte rekomanduar kryerja e rezonancës magnetike.

Megjithatë, kur ishte paraqitur në QKUK për të caktuar terminin, ajo thotë se i ishte kërkuar të priste disa muaj.

“Shkova për termine për një rezonancë, më tha të pres deri në muajin nëntor. Imagjinoje në atë gjendje të presësh deri në nëntor”, ka rrëfyer pacientja për Gazetën Infokus.

-Advertisement-

Sipas saj, gjendja shëndetësore nuk ia lejonte një pritje kaq të gjatë, prandaj ishte detyruar ta kryente ekzaminimin në një institucion privat.

“Unë duke parë gjendjen time u detyrova të mos pres, të shkoj privat, por po mendoja për persona që s’i kanë mundësitë”, është shprehur ajo.

Por kjo nuk është e vetmja paciente që është përballur me termine të largëta për rezonancë magnetike në QKUK.

Nga qershori i vitit 2025, termini i radhës në janar të vitit 2027

Një tjetër paciente kishte aplikuar për rezonancë magnetike më 15 prill të vitit 2025.

Sipas dokumenteve që ka siguruar Gazeta Infokus, termini i parë për ekzaminim i ishte caktuar më 18 qershor 2025.

Mirëpo, sipas pacientes, ky termin i ishte shtyrë dhe ekzaminimi i ishte caktuar për datën 16 janar 2027.

Kjo nënkupton një diferencë prej 577 ditësh ndërmjet dy termineve, apo rreth një vit e shtatë muaj.

Të dy dokumentet e siguruara nga Infokusi përmbajnë datat përkatëse të termineve, ndërsa arsyet e ndryshimit të tyre nuk sqarohen në dokumente.

Këto dy raste nxjerrin në pah shqetësimet e pacienteve lidhur me pritjet e gjata për ekzaminime në Klinikën e Radiologjisë së QKUK-së.

Ndërsa njëra prej tyre thotë se është detyruar të kërkojë shërbim në sektorin privat, mbetet e hapur pyetja se çfarë ndodh me pacientët që nuk kanë mundësi financiare t’i kryejnë këto ekzaminime jashtë institucioneve publike./Gazeta Infokus

Udhëto nga Suedia drejt Kosovës me PrishtinaTickets

Sponsoruar

-Advertisement-