Agjencia e Statistikave të Kosovës (ASK) ende nuk i ka publikuar të dhënat e Anketës së Fuqisë Punëtore (AFP) për tremujorin e katërt të vitit 2025 dhe rezultatet vjetore, ndonëse kanë kaluar gati nëntë muaj nga përfundimi i vitit 2025, ndërsa tashmë po i afrohemi edhe fundit të vitit 2026.

Më 23 shtator 2026, Kosova vazhdon të mos ketë një pasqyrë të plotë të fuqisë punëtore për vitin 2025, një prej statistikave kryesore për matjen e punësimit, papunësisë dhe pjesëmarrjes në tregun e punës.

Në një përgjigje për Gazetën Infokus, ASK është arsyetuar se vonesat lidhen me një varg ndryshimesh metodologjike dhe operacionale të ndërmarra gjatë dy viteve të fundit.

-Advertisement-

Ndërkohë që ASK-ja ende si arsye po e përdor Regjistrimin e Popullsisë të zhvilluar qysh në prill-maj të vitit 2024, ku sipas tyre është krijuar një kornizë e re e mostrës bazuar në të dhënat e përditësuara të regjistrimit dhe është përzgjedhur një mostër e re edhe për AFP-në.

Po ashtu, pyetësori i Anketës së Fuqisë Punëtore është ridizajnuar për t’iu përshtatur rregulloreve, koncepteve dhe përkufizimeve të fundit, ndërsa është prezantuar edhe një sistem i ri për mbledhjen e të dhënave, i bazuar në “Survey Solutions”.

“Këto ndryshime metodologjike dhe sistemore kërkuan përgatitje shtesë dhe kontribuan në vonesën e fillimit të procesit të mbledhjes së të dhënave të AFP-së”, thuhet në përgjigjen e ASK-së për Infokus.

Por, përveç ndryshimeve metodologjike, ASK ka pranuar se procesi është ndikuar edhe nga kapacitetet e kufizuara njerëzore.

“Mbledhja e të dhënave është ndikuar nga kapacitetet e kufizuara të stafit në disa zyra rajonale, gjë që ka ndikuar në orarin e përgjithshëm të përpunimit dhe prodhimit të të dhënave”, ka bërë të ditur Agjencia.

Një tjetër arsye e përmendur është angazhimi i stafit të ASK-së në proceset që lidhen me Regjistrimin e Popullsisë 2024, përfshirë publikimin e rezultateve dhe përgatitjen e rezultateve tematike.

Sipas ASK-së, kjo ka kërkuar “burime të konsiderueshme njerëzore dhe teknike” në nivel të Agjencisë.

Aktualisht janë publikuar rezultatet e AFP-së për tre tremujorët e parë të vitit 2025.

Ndërkaq, ASK kishte bërë të ditur për Infokus se të dhënat për TM4 2025 dhe rezultatet vjetore të AFP-së 2025 ishin planifikuar të publikoheshin gjatë javës së 21 shtatorit 2026.

Megjithatë, deri më 23 shtator, publikimi ende nuk është bërë.

ASK thotë se po ndërmerr masa për forcimin e kapaciteteve të burimeve njerëzore dhe përmirësimin e organizimit të mbledhjes, përpunimit dhe prodhimit statistikor, me qëllim zvogëlimin e rrezikut që vonesa të ngjashme të përsëriten.

“ASK-ja mbetet e përkushtuar për të siguruar prodhimin dhe shpërndarjen në kohë të statistikave të tregut të punës me cilësi të lartë në përputhje me standardet dhe kërkesat statistikore evropiane”, thuhet në përgjigje.

Në anën tjetër, si një burim tjetër administrativ për të parë zhvillimet në punësimin formal, Fondi i Kursimeve Pensionale i Kosovës (Trusti) publikon gjatë vitit të dhëna periodike për kontribuuesit aktivë, duke ofruar shifra më të afërta me periudhën aktuale./Gazeta Infokus

Udhëto Oslo – Prishtinë çdo javë me PrishtinaTickets

Sponsoruar

-Advertisement-