Lajme

LVV në Prizren kritikon punën e Totajt gjatë shkurtit: Vazhdon avazi i keqqeverisjes komunale

Autori: Gazeta inFokus 19:15 | 09 March 2023

Lëvizja Vetëvendosje, Qendra në Prizren, sot ka mbajtur një konferencë për media, për të folur rreth qeverisjes në Komunën e Prizrenit nga kryetari Shaqir Totaj gjatë muajit shkurt.

Asamblisti nga kjo parti, Islam Thaçi tha se edhe gjatë muajit shkurt ka vazhduar avazi i njëjtë i “keqqeverisjes komunale”.

“Kryetarin nuk e shqetëson fakti se për një vit qytetarëve i është vështirësuar qarkullimi me vetura e në veçanti këmbësorëve nga pengesat e shumta nga Operatorët Ekonomik apo ndërtuesit banesor, të cilët kanë uzurpuar trotuaret dhe korësi të rrugëve kryesore në qytet!

-Advertisement-

Thaçi po ashtu tha se ka parregullsi në konkurset për punësim.

”Kanë kaluar 9 muaj prej se kur është bërë shpallja publike e konkursit për Stomatolog, dhe ne ende nuk kemi përgjigje se çka ka ndodhur me këtë konkurs. Situatë e njëjtë është edhe për konkursin për Sekretarë të shkollave, i cili është hapur, anuluar dhe është hapur përsëri”.

Asamblisti tjetër, Ilir Gashi, foli për suficitin e lartë buxhetor të pushtetit komunal, që sipas tij, pasqyron një keqmenaxhim dhe dështim të qeverisjes komunale.

“Raporti i Realizimit të Buxhetit për vitin 2022, tregon se Komuna e Prizrenit ka dalur me shifër rekorde të suficitit financiar që kap shumë e mbi 9 milionë eurove. Nga kjo shumë totale, 5,454,932.00 euro, janë nga Granti Qeveritar dhe 3,817,543.00 euro, janë nga Buxheti Vetanak i Komunës. Pra, afër 5.5 milion euro do të kthehen në Buxhetin Qendror, ndërsa pjesa tjetër e suficitit mund të barten në buxhetin e vitit të ardhshëm. Asnjëherë më parë në historinë e komunës së Prizrenit nuk ka pasur suficit financiar kaq të lartë! Me këtë, ekzekutivi komunal dhe kryetari Shaqir Totaj, kanë dëshmuar paaftësi menaxheriale në realizimin e shumë projekteve kapitale dhe në shpenzimin e parasë publike”, tha ai.

“Statistikat e nxjerra nga Raporti për Shpenzimet e Buxhetit për vitin 2022 na tregojnë se gjashtë drejtori komunale nuk kanë arritur të e shpenzojnë as 50% të buxhetit në kategorinë e investimeve kapitale”, shtoi Gashi.

Subscribe në YouTube: GAZETA INFOKUSI