Opinione

Importi energjetik që mbush kuletën serbe

Autori: Agron Hoti 18:00 | 26 January 2023

Rusia përmes Serbisë në këto gati 24 vite çlirim ka pasur një synim madhor, që Kosova në asnjë variant të mos pavarësohej energjetikisht, por të varej vazhdimisht nga importi i energjisë. Asnjëherë politika e Kosovës s’e ka lexuar drejt këtë projeksion serb e rus. Varësia energjetike e Kosovës çonte ujë drejtëpërdrejtë në Serbi, e cila edhe sot vazhdon ta kontrollojë tregun e energjisë në rajonin sipas kushteve ruse. Martin Berishaj në Kosovë dhe Damir Fazlliç në Shqipëri po shihen të kenë qenë promovuesit e projeksioneve energjetike serbe e ruse në rajon tërësisht kundër amerikanëve.

Të gjithëve na kujtohen sulmet e parreshtura vendore e ndërkombëtare në Kosovë që i bëheshin ndër vite ndërtimit të termocentralit të ri në emër të disa ‘standardeve’, të cilat BE as vet s’i respektonte. Dhe përfundimisht në vitin 2020 e 2021 Kosova edhe zyrtarisht e pati refuzuar gazin e lëngshëm amerikan dhe termocentralin që deshën ta ndërtonin amerikanët duke ngelur tanimë me gishta në gojë.

Refuzimi në Kuvend nga Kosova i Marrëveshjes për Normalizimin Ekonomik mes Kosovës e Serbisë të nënshkruar më 4 shtator 2020 në Shtëpi të Bardhë ishte i shtyrë nga evropianët e kontrolluar nga rusët që Kosova të mos e diversifikonte energjinë dhe që mos të lidhej e integrohej me rajonin.

Pra, sa më shumë që Kosova importon energji aq më shumë para shkojnë në duar të serbëve që kontrollojnë tregun energjetik rajonal. Sa më shumë që Kosova blen energji aq më pak zhvillohet, sepse harxhon shumë para për energji, e ky ishte dhe vazhdon të jetë synimi serb e rus për ta dështuar shtetin e Kosovës, të cilin e shohin si projekt amerikan.

E sot jemi saktësisht siç na do Serbia e Rusia, pa gaz të lëngshëm amerikan, pa plan për termocentral të ri, pa stabilitet energjetik, pa rritje të duhur ekonomike dhe me shkallën më të lartë të antiamerikanizmit në këto 24 vite çlirim. A.H.

Rritje e frikshme e kërkesave për kompensim të dëmeve të lehta

Të tjera

Fokusi

opinione