Derisa Agjencia Kosovare e Privatizimit (AKP) arsyetohej se pronat po shiteshin me çmime të ulëta për shkak se ndodheshin në zona ku “nuk dëshiron askush t’i blejë”, dokumentet e siguruara nga Gazeta Infokus zbulojnë një tjetër realitet.

Nga vetëm 127 deri në 160 euro për metër katror, AKP-ja ka miratuar shitjen direkte të 18 ngastrave kadastrale në Prishtinë, kryeqytetin ku çmimet e patundshmërive arrijnë ndër më të lartat në Kosovë.

Madje, disa prej këtyre pronave ndodhen në lagjen e njohur Emshir, ku çmimet e pronave të ndërtuara në treg mund të arrijnë deri në 2 mijë euro për metër katror.

-Advertisement-

Pra, ndërsa AKP-ja i arsyetonte çmimet e ulëta me mungesën e interesimit për prona në zona të caktuara, dokumentet tregojnë se shitje me çmime të tilla janë miratuar edhe në kryeqytet, përfshirë parcela në një lagje të zhvilluar si Emshiri. Kjo sipas 18 vendimeve zyrtare që ka siguruar Gazeta Infokus, vetëm të vitit 2025.

Në 16 prej këtyre shitjeve, çmimi ka qenë fiks 160 euro për metër katror, ndërsa në një rast tjetër ka zbritur në vetëm 126.67 euro.

Të gjitha këto shitje janë miratuar më 14 mars 2025 nga Bordi i Drejtorëve të AKP-së.

Disa prej këtyre ngastrave, sipas verifikimeve në Gjeoportalin e Kosovës, ndodhen në lagjen Emshir, ku çmimet e pronave të ndërtuara në treg mund të arrijnë deri në 2 mijë euro për metër katror.

 

16 prona të shitura për 160 euro metri katror, disa prej tyre në Emshir

Ajo që bie në sy nga këto shitje është vendndodhja e disa prej pronave.

Gazeta Infokus ka verifikuar numrat kadastralë të ngastrave në Gjeoportalin e Kosovës, ku ka identifikuar tri prej tyre në lagjen Emshir të Prishtinës.

Emshiri është një nga zonat e zhvilluara urbane të Prishtinës, me shtëpi, objekte banimi dhe prona që ofrohen në treg për qindra mijëra euro.

Në këtë lagje, çmimet e kërkuara për shtëpi mund të arrijnë 200 mijë euro e më shumë, ndërsa për disa prona të ndërtuara çmimi për metër katror mund të shkojë deri në 2 mijë euro.

Në anën tjetër, ngastrat e identifikuara në këtë lagje janë shitur nga AKP-ja me 160 euro për metër katror.

Nga verifikimet në Gjeoportal, në disa prej parcelave rezultojnë edhe ndërtime ekzistuese. Dokumentet e shqyrtuara të AKP-së, megjithatë, nuk përcaktojnë se këto objekte kanë qenë pjesë e shitjeve.

Për parcelat e tjera të përfshira në vendime, Gazeta Infokus nuk ka arritur ende të konfirmojë vendndodhjen e tyre të saktë përmes verifikimit të deritanishëm në Gjeoportal.

NDIQNI STORIEN:

Kush i bleu pronat dhe me çfarë çmimesh?

Shitja me çmimin më të ulët për metër katror është miratuar për pesë persona me mbiemrin Havolli.

Sipas vendimit BD-220/149, AKP-ja ka miratuar shitjen e dy ngastrave kadastrale, me numra 7613-6 dhe 7613-14, me sipërfaqe përkatësisht 10 dhe 8 metra katrorë.

Sipërfaqja e përgjithshme prej 18 metrash katrorë është shitur për 2 mijë e 280 euro, apo rreth 126.67 euro për metër katror. Blerësit e përmendur në vendim janë Visar Havolli, Drilon Havolli, Gëzim Havolli, Avni Havolli dhe Zijadin Havolli.

 

Në një tjetër vendim,  AKP-ja ka miratuar shitjen e një ngastre prej 18 metrash katrorë për 2 mijë e 880 euro.

Blerës i kësaj prone është Adem Jashari, ndërsa çmimi për metër katror ka qenë 160 euro. Parcela mban numrin kadastral 7613-11.

 

Përmes vendimit BD-220/136, një sipërfaqe prej 35 metrash katrorë i është shitur Maliq Jasharit për 5 mijë e 600 euro.

 

Edhe në këtë rast, çmimi ka qenë 160 euro për metër katror. Ngastra mban numrin kadastral 7613-19.

 

 

Një sipërfaqe tjetër prej 62 metrash katrorë është miratuar për shitje në vlerë prej 9 mijë e 920 eurosh.

Blerësi është Muhamet Hoxha, ndërsa parcela mban numrin kadastral 7613-5. Çmimi për metër katror rezulton 160 euro, sipas vendimit përfundimtar BD-220/137 të identifikuar nga Infokus.

 

Ndërkaq, Nusret Jashari ka blerë një ngastër prej 79 metrash katrorë, për të cilën janë paguar 12 mijë e 640 euro.

Kjo shitje është miratuar përmes vendimit BD-220/138, me çmim prej 160 eurosh për metër katror.

 

Me të njëjtin çmim, AKP-ja ka miratuar shitjen e 60 metrave katrorë tokë për Isuf Jasharin.

Sipas vendimit BD-220/139, prona me numër kadastral 7613-9 është shitur për 9 mijë e 600 euro.

 

Një tjetër ngastër prej 13 metrash katrorë i është shitur Remzi Binakajt për vetëm 2 mijë e 80 euro.

Shitja është miratuar përmes vendimit BD-220/140, me çmim prej 160 eurosh për metër katror.

 

 

Në Emshir është identifikuar edhe parcela me numër kadastral 7613-10, e cila sipas vendimit BD-220/141 i është shitur Miftar Jasharit.

Për këtë sipërfaqe prej 11 metrash katrorë, AKP-ja ka miratuar çmimin prej 1 mijë e 760 eurosh, apo 160 euro për metër katror.

 

 

Edhe Sami Jashari figuron në listën e blerësve të këtyre pronave.

Sipas vendimit BD-220/142, ai ka blerë një ngastër prej 56 metrash katrorë, me numër kadastral 7613-22, për 8 mijë e 960 euro.

 

 

Përmes vendimit BD-220/143, një sipërfaqe prej 21 metrash katrorë i është shitur Remzije Jasharit për 3 mijë e 360 euro.

Parcela ka numrin kadastral 7613-18 dhe është shitur me çmim prej 160 eurosh për metër katror.

 

 

Në listën e blerësve figuron edhe Avni Berveniku, i cili ka blerë një ngastër prej 17 metrash katrorë për 2 mijë e 720 euro.

Shitja është miratuar përmes vendimit BD-220/144, për parcelën me numër kadastral 7613-12.

 

[KËTU VENDOSET DOKUMENTI BD-220/144 – AVNI BERVENIKU]

Një tjetër person me të njëjtin mbiemër, Armend Berveniku, ka blerë një sipërfaqe prej 70 metrash katrorë.

Sipas vendimit BD-220/145, prona me numër kadastral 7613-13 është shitur për 11 mijë e 200 euro, apo 160 euro për metër katror.

 

 

Për 20 metra katrorë të tjerë, AKP-ja ka miratuar shitjen në vlerë prej 3 mijë e 200 eurosh.

Blerës është Besim Krasniqi, ndërsa ngastra me numër kadastral 7613-20 është përfshirë në vendimin BD-220/146.

 

Një sipërfaqe prej 54 metrash katrorë i është shitur Rexhep Jasharit për 8 mijë e 640 euro. Edhe kjo shitje është realizuar me çmim prej 160 eurosh për metër katror, sipas vendimit BD-220/147. Parcela ka numrin kadastral 7613-15.

 

Shitja me vlerën më të ulët totale është ajo e një ngastre prej vetëm 4 metrash katrorë.

Sipas vendimit BD-220/148, prona me numër kadastral 7613-8 i është shitur kompanisë Nartel Exin SHPK për vetëm 640 euro.

Edhe këtu çmimi ka qenë 160 euro për metër katror.

 

 

Në një tjetër rast, AKP-ja ka miratuar shitjen e 18 metrave katrorë për Jaush Planën.

Sipas vendimit BD-220/150, parcela me numër kadastral 7613-16 është shitur për 2 mijë e 880 euro, apo 160 euro për metër katror.

 

 

Ndërsa shitja me vlerën më të lartë totale nga këto 17 vendime është ajo e një ngastre prej 154 metrash katrorë.

Sipas vendimit BD-220/151, kjo pronë me numër kadastral 7613-7 është shitur për 24 mijë e 640 euro.

Blerësit e përmendur në dokument janë Bahridin Rama, Mehdi Rama, Ahmet Rama dhe Isak Rama.

Çmimi për metër katror ka qenë sërish 160 euro.

 

 

Tetë shitje për persona me të njëjtin mbiemër

Një tjetër element që bie në sy nga shqyrtimi i dokumenteve është se tetë prej 17 vendimeve të shitjes direkte kanë si blerës persona me mbiemrin Jashari.

Këto tetë shitje përfshijnë gjithsej 334 metra katrorë, të shitur për 53 mijë e 440 euro.

Në të gjitha këto raste, çmimi ka qenë i njëjtë: 160 euro për metër katror.

Në përfundim, nga 17 vendimet e miratuara më 14 mars 2025, rezulton se AKP-ja ka shitur gjithsej 18 ngastra kadastrale në Prishtinë.

Çmimi më i ulët ka qenë rreth 127 euro për metër katror, ndërsa në 16 shitjet e tjera është aplikuar çmimi prej 160 eurosh.

Në këto vendime thuhet se vlerësimi është bërë duke marrë parasysh shfrytëzimin aktual të pronave dhe klasifikimin e aseteve apo pjesëve të tyre.

Po ashtu, në dokumente theksohet se blerësit kanë paguar vlerën e aseteve para miratimit të raporteve përfundimtare nga Bordi i Drejtorëve.

Ndërkohë, identifikimi i disa prej parcelave në lagjen Emshir e vendos një pjesë të këtyre shitjeve në një zonë ku tregu i patundshmërive karakterizohet nga çmime shumë më të larta për shtëpitë dhe objektet e ndërtuara./Gazeta Infokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-