Ceremonia e diplomimit të gjeneratës së 63-të të kadetëve të Policisë së Kosovës, e cila tash e më shumë se një javë është bërë temë diskutimi për shkak të problemeve organizative, po përcillet me një tjetër problem, këtë herë me hapësirën ku pritet të mbahet ceremonia.

Fillimisht mungesa e uniformave, më pas problemi me kapelat, e tani edhe kufizimi i numrit të familjarëve që mund të marrin pjesë në ceremoninë e diplomimit.

Gazeta Infokus kishte raportuar ekskluzivisht se ceremonia e diplomimit, e paraparë të mbahej më 30 tetor, ishte shtyrë për një javë për shkak se institucionet përgjegjëse nuk kishin arritur t’i siguronin me kohë uniformat për kadetët.

-Advertisement-

Më pas, sipas informacioneve të siguruara nga Infokusi, u raportua se uniformat dhe kapelat ishin huazuar nga gjeneratat e mëparshme, në mënyrë që ceremonia të mund të mbahej, ani pse me vonesë dhe jo kur ishte planifikuar.

Por problemet nuk përfunduan me kaq.

Tani, vetëm pak ditë para ceremonisë së shtyrë për më 6 nëntor, kadetët janë përballur me një tjetër kufizim.

Gazeta Infokus ka siguruar një mesazh që u është dërguar kadetëve, përmes të cilit ata njoftohen se në ceremoninë e diplomimit mund të marrin pjesë vetëm nga dy familjarë për secilin kadet.

Sipas informacionit të përcjellë në këtë mesazh, kufizimi lidhet me faktin se salla ku do të organizohet ceremonia nuk është plotësisht e lirë.

Kjo nënkupton se, edhe pas shtyrjes së ceremonisë për një javë, institucionet përgjegjëse nuk kanë arritur të sigurojnë hapësirën e nevojshme për organizimin e plotë të saj apo ndoshta problemi ka qenë pikërisht shtyerja për një javë e kësaj ceremonie.

Nga mungesa e uniformave dhe kapelave, deri te mungesa e hapësirës për familjarët, organizimi i diplomimit të kadetëve po nxjerr në pah një varg problemesh që ngrenë pikëpyetje serioze për planifikimin institucional.

Pas gjashtë muajsh përgatitjeje në Akademinë e Kosovës për Siguri Publike, ceremonia e diplomimit do të duhej të ishte një moment krenarie për kadetët dhe familjet e tyre.

Në vend të kësaj, kadetët po përballen me kufizime të njëpasnjëshme, ndërsa familjarëve u duhet të vendosin se cilët prej tyre do të kenë mundësi të marrin pjesë në një nga momentet më të rëndësishme të karrierës së tyre.

Për një institucion që përgatit zyrtarët e ardhshëm të Policisë së Kosovës, sigurimi i uniformave, kapelave dhe një salle të përshtatshme për diplomim do të duhej të ishte pjesë e planifikimit bazik, e jo problem që zgjidhet në momentet e fundit./Gazeta Infokus

SKANDAL: Kadetët njoftohen se mund t’u dështojë ceremonia e diplomimit sepse shteti nuk ka uniforma për ta

“Shteti pa uniforma për kadetët” – Reagon Kabashi – Ramaj: Është banale dhe tragjike sepse tregon që MPB-ja ka probleme serioze

Urime, pas një dështimi, shteti siguron uniformat për gjeneratën e 63-të të Policisë së Kosovës, ceremonia të premten

 

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-