Në kohën kur Kosova po përballet me mungesë të prodhimit të energjisë elektrike dhe po shpenzon miliona euro për importin e rrymës, Korporata Energjetike e Kosovës (KEK), e cila është përgjegjëse për prodhimin e energjisë, ka vendosur të shpenzojë mbi 26 mijë euro për një gjenerator për ndërtesën e vet në Toskanë në Prishtinë.

Derisa vendi po përballet me probleme të vazhdueshme në sektorin e energjisë, duket se edhe vetë KEK-u ka nevojë të sigurohet që të mos mbetet pa rrymë.

Sipas dokumenteve zyrtare të prokurimit, KEK-u më 28 gusht 2026 ka nënshkruar kontratë në vlerë prej 26 mijë e 550 eurosh për furnizimin dhe montimin e një gjeneratori për nevojat e ndërtesës Toskane në Prishtinë.

-Advertisement-

Kontrata është nënshkruar me kompaninë “Eor Group SH.P.K.”, ndërsa për këtë blerje KEK-u fillimisht kishte planifikuar të shpenzonte deri në 40 mijë euro.

Në tender kishin marrë pjesë shtatë kompani, prej të cilave gjashtë ishin vlerësuar se i plotësonin kushtet. Oferta më e ulët ishte 26 mijë e 550 euro, ndërsa më e larta nga ofertat e pranueshme ishte 34 mijë e 987 euro.

Afati për realizimin e kontratës ishte paraparë të jetë 60 ditë.

 

KEK-u blen gjenerator për vete, Kosova shpenzon miliona për rrymë nga jashtë

Kjo kontratë vjen në një kohë kur Kosova vazhdon të përballet me probleme në prodhimin e energjisë elektrike, ndërsa shpenzimet për importin e rrymës po arrijnë shifra milionëshe.

Vetëm gjatë shtatë ditëve, nga 28 tetori deri më 3 nëntor 2026, sipas të dhënave të fundit, Kosova ka shpenzuar rreth 14.9 milionë euro për importin e energjisë elektrike, apo mesatarisht mbi 2 milionë euro në ditë.

Këto shpenzime lidhen me nevojën për të siguruar energji nga jashtë në kohën kur prodhimi vendor nuk po arrin kurrsesi t’i mbulojë të gjitha nevojat.

E derisa miliona euro po shkojnë për blerjen e rrymës nga jashtë, KEK-u, që ka për detyrë ta prodhojë atë brenda vendit, ka nënshkruar kontratë për blerjen e një gjeneratori për ndërtesën e vet.

Pra, në një vend ku prodhimi i energjisë elektrike vazhdon të jetë problem, edhe korporata që e prodhon rrymën ka vendosur të sigurojë një burim rezervë të energjisë për zyrat e saj.

Në vend të lajmeve për rritjen e prodhimit të energjisë dhe uljen e nevojës për import, pas mburrjeve të shumta për investime pikërisht në KEK e në termocentrale një nga kontratat e KEK-ut është pikërisht ajo për furnizimin e ndërtesës së vet me gjenerator.

Edhe pse blerja e një gjeneratori mund të jetë e nevojshme për punën e ndërtesës, kjo kontratë tregon një të vërtet të madhe me gjendjen e përgjithshme të energjisë në Kosovë.

Derisa qytetarët presin më shumë prodhim të rrymës dhe më pak shpenzime për import, KEK-u po sigurohet që të paktën ndërtesa e vet të ketë gjenerator./Gazeta Infokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-