Ramiz Lladrovci ka reaguar ndaj numrit të madh të pretenduesve për të marrë drejtimin e Partisë Demokratike të Kosovës (PDK), duke ironizuar me gatishmërinë e tyre për ta “sakrifikuar” veten për partinë.

Përmes një postimi në Facebook, Lladrovci ka shprehur habinë me ambiciet e disa prej kandidatëve, duke theksuar se udhëheqja e PDK-së kërkon shumë më tepër sesa dëshirën për të qenë në krye të saj.

Ai ka përmendur një sërë sfidash me të cilat përballet Kosova, përfshirë raportet me Shtetet e Bashkuara të Amerikës, integrimin evropian, largimin e të rinjve, zhvillimin ekonomik dhe sundimin e ligjit.

-Advertisement-

“Për disa pretendentë që synojnë të bëhen kryetar të PDK-së, po më habisin me guximin e tyre. Kërkohet guxim për të qenë partner me Amerikën, zgjidhjen e çështjeve si dialogu strategjik, agjendën evropiane dhe procesin integrues”, ka shkruar Lladrovci.

Ai ka thumbuar kandidatët që tashmë kanë shprehur ambiciet e tyre për ta udhëhequr partinë, duke u bërë thirrje të mos ndërhyjnë në procesin e brendshëm zgjedhor.

“Kandidatët e deklaruar deri më tani për kryetar, të vetëofruar e janë me numër besa gati sa gishtat e duarve që duan ta ‘sakrifikojnë’ veten për PDK-në, i lus deri në qiell, mos u sakrifikoni”, ka deklaruar ai.

Sipas Lladrovcit, zgjedhja e kryetarit të ri duhet të bëhet përmes një procesi të rregullt, ku të mbizotërojnë programi dhe aftësitë e kandidatëve, e jo interesat personale.

“Leni procesin normal të zgjedhjeve të brendshme të zhvillohet si duhet, pa përdorur bërrylat dhe duke keqpërdorur vullnetin e simpatizantëve. Le të fitojë programi dhe aftësia për ta riafirmuar PDK-në, siç ka qenë, konstantë e shtetit”, ka theksuar ai.

Lladrovci ka kritikuar edhe mënyrën se si, sipas tij, njerëzit e suksesshëm janë larguar ndër vite nga vendimmarrja brenda partisë.

Ai ka thënë se disa nga ata që sot synojnë drejtimin e PDK-së i kanë arritur ambiciet e tyre personale falë mbështetjes së anëtarësisë së kësaj partie.

“Ata që kanë ambicie për t’u bërë lider i PDK-së, kanë ambicie deri diku edhe të arsyeshme, sepse qëllimet jetësore tashmë i kanë arritur. Sigurisht, ata kanë arritur në saje të anëtarësisë atdhetare të kësaj partie të dalë nga Drejtoria politike e UÇK-së”, ka shkruar Lladrovci.

Në fund, ai ka lëshuar një tjetër kritikë ndaj pretenduesve për kryetar, duke thënë se disa prej tyre po synojnë një pozitë për të cilën, sipas tij, nuk do të duhej të ishin ndër të parët që garojnë.

“Ka vite që të suksesshmit largohen nga vendimmarrja, andaj atyre ju ka mbetur të sprovohen edhe aty ku do të duhej të jenë të fundit që do të sprovoheshin, kryetar a kryetare me dry në xhep”, ka përfunduar Lladrovci./Gazeta Infokus

Udhëto Oslo – Prishtinë çdo javë me PrishtinaTickets

Sponsoruar

-Advertisement-