Gjykimi ndaj Thaçit e të tjerëve fillon më 1 mars nëse nuk ka rrethana përjashtimore
Autori: Gazeta inFokus 16:22 | 18 January 2023
Kryetari i trupit gjykues, Charles L Smith III, ka nxjerrë urdhër në bazë të së cilit është caktuar 1 marsi si datë që do të filloj gjykimi ndaj Hashim Thaçit, Kadri Veselit, Jakup Krasniqit dhe Rexhep Selimit. Ai tha se kjo do të jetë data e fillimit nëse nuk ka rrethana përjashtimore.
Tutje, ai ka urdhëruar Zyrën e Prokurorit të Specializuar (ZPS) që të dorëzojë mocionet në bazë të rregullës 117(1) deri më datën 1 shkurt 2023, derisa palët pjesëmarrëse janë urdhëruar të bëjnë përgjigjet e tyre jo më vonë se data 8 shkurt, ora 16:00.
ZPS është urdhëruar që të dorëzojë mocionet lidhur me grupin e dytë të 12 dëshmitarëve brenda 15 marsit 2023. Pala mbrojtëse dhe mbrojtësja e viktimave janë urdhëruar që t’i dorëzojnë përgjigjet ndaj këtyre mocioneve nëse dëshirojnë jo më vonë se 27 marsi 2023.
“Urdhri që ka të bëj me afatin për kërkesat për viktimat pjesëmarrëse në proces, zyra administrative kërkohet të dorëzojë aplikimet për pjesëmarrjen e viktimave brenda datës 15 shkurt. Palët kërkohet të paraqesin mocionet lidhur me bazën ligjore për pjesëmarrjen dhe përfaqësimin e përbashkët nëse dëshirojnë të bëjnë një gjë të tillë deri jo më vonë 23 shkurti”, ka thënë ai.
Tutje, ZPS dhe pala mbrojtëse janë urdhëruar të dorëzojnë mocionet për faktet e gjykuara para 1 marsit 2023. Palët janë urdhëruar që nëse dëshirojnë të dorëzojnë përgjigjet e këtyre mocioneve para datës 3 prill 2023 dhe kundërpërgjigjet nëse dëshirojnë mund të dorëzohen jo më vonë se 10 prill.
ZPS është urdhëruar të dorëzoj mocionin e parë të rregullës 155 para 1 marsit.
Sipas urdhrit, mbrojtja dhe mbrojtësit e viktimave mund të përgjigjen jo më vonë se 22 marsi, derisa ZPS mund të kundërpërgjigjet brenda datës 29 mars.
Gjykatësi bëri të ditur se konferenca përgatitore e ZPS-së për gjykim do të mbahet me 17 shkurt 2023.
“ZPS kërkohet të paraqes në konferencë përgatitore një vlerësim të kohëzgjatjes së argumenteve të saj”, tha ai.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit. Kjo pasi, gjykatësi e kishte aprovuar pjesërisht mocionin e mbrojtjes së Hashim Thaçit, të parashtruar ndaj aktakuzës së ndryshuar në rastin ku ai me Kadri Veselin, Jakup Krasniqin e Rexhep Selimin, po akuzohen për krime lufte dhe ZPS ishte urdhëruar të bëjë ndryshime në aktakuzën e ndryshuar.
Në këtë aktakuzë, thuhet se përmes veprimeve dhe mosveprimeve të përshkruara më lart, Hashim Thaçi, Kadri Veseli, Rexhep Selimi dhe Jakup Krasniqi, kanë kryer përmes pjesëmarrjes së tyre në një ndërmarrje të përbashkët kriminale dhe/ose kanë ndihmuar dhe nxitur krimet e ngarkuara në këtë aktakuzë.
Sipas prokurorisë, krahas kësaj ose në alternativë, Hashim Thaçi, Kadri Veseli, Rexhep Selimi dhe Jakup Krasniqi janë përgjegjës si eprorë për krimet e kryera nga vartësit e tyre.
Tutje, aktakuza thotë se Thaçi, Veseli, Selimi dhe Krasniqi, e dinin ose kishin arsye të dinin se krimet e akuzuara në këtë aktakuzë ishin gati të kryheshin ose ishin kryer nga vartësit e tyre dhe nuk kishin marrë masat e nevojshme dhe të arsyeshme për parandalimin e krimeve të tilla ose të ndëshkojnë autorët e saj.
“Hashim Thaçi, Kadri Veseli, Rexhep Selimi dhe Jakup Krasniqi individualisht penalisht përgjegjës për: pikën 1 persekutim mbi baza politike dhe/ose etnike, krim kundër njerëzimit, i dënueshëm sipas nenit 13 (1) (h), 16 (1) ( a), dhe 16 (1) (c) të Ligjit; Pika 2: burgim, krim kundër njerëzimit, i dënueshëm sipas neneve 13 (1) (e), 16 (1) (a) dhe 16 (1) (c) të Ligjit; pikën 3 arrestimi dhe paraburgimi i paligjshëm ose arbitrar, krim lufte, i dënueshëm sipas neneve 14 (1) (c), 16 (1) (a), dhe 16 (1) (c) të Ligjit”, thuhet në aktakuzë nga ana e prokurorisë.
Në pikën 4, ata ngarkohen me veprën akte tjera çnjerëzore, krim kundër njerëzimit, i dënueshëm sipas neneve 13 (1) (j), 16 (1) (a) dhe 16 (1) (c) të Ligjit, kurse në pikën 5 për trajtim mizor, krim lufte, i dënueshëm sipas neneve 14 (1) (c) (i), 16 (1) (a) dhe 16 (1) (c) të Ligjit.
“Pika 6: torturë, krim kundër njerëzimit, i dënueshëm sipas neneve 13 (1) (f), 16 (1) (a) dhe 16 (1) (c) të ligji; Pika 7: torturë, krim lufte, i dënueshëm sipas neneve 14 (1) (c) (i), 16 (1) (a) dhe 16 (1) (c) të Ligjit; Pika 8: : vrasje, krim kundër njerëzimit, i dënueshëm sipas neneve 13 (1) (a), 16 (1) (a) dhe 16 (1) (c) të Ligjit; Pika 9: vrasje, krim lufte, i dënueshëm sipas neneve 14 (1) (c) (i), 16 (1) (a) dhe 16 (1) (c) të Ligjit; Pika 10: zhdukja e detyruar e personave, krim kundër njerëzimit, i dënueshëm sipas neneve 13 (1) (i), 16 (1) (a) dhe 16 (1) (c) të Ligjit”, thotë aktakuza.
Më 29 prill, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.
Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.
Në aneksin e publikuar sa i përket krimeve që pretendohen se ndodhën në Semetishtë dhe Budakovë, prokuroria ka listuar krimet e luftës si arrestimi dhe ndalimi i paligjshëm ose arbitrar, trajtim mizor ose çnjerëzor, torturë, vrasje. Ndërkaq, si krime kundër njerëzimit i ka listuar burgimin, vepra të tjera çnjerëzore, torturën, vrasjen, zhdukjen e personave me forcë dhe persekutimin.
Kurse, për krimet që pretendon që ndodhën në Gjilan, si krime lufte i ka listuar arrestimi dhe ndalimin e paligjshëm ose arbitrar, trajtimin mizor ose çnjerëzor, torturën dhe vrasjen. Ndërsa, si krime kundër njerëzimit ka listuar burgimin, vepra të tjera çnjerëzore, torturën, vrasjen dhe persekutimin.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.
Njëjtë është deklaruar edhe Veseli në paraqitjen e tij më 10 nëntor, sikurse edhe Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Sipas akuzës, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.
“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.
Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.Sipas aktakuzës, të akuzuarit bashkë me udhëheqësit tjerë të UÇK-së kontribuuan në arritjen e qëllimit t përbashkët.
“Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues. /BetimipërDrejtësi
Të tjera
-
Abixhiku i vendosur, përsërit thirrjen për dorëheqjen e Kurtit
Tashmë ka filluar edhe mbledhja e Këshillit të Përgjithshëm të Lidhjes Demokr...
-
Nis mbledhja e Këshillit të Përgjithshëm të LDK-së
Me intonimin e himnit kombëtar dhe atë shtetëror, ka nisur mbledhja e...
-
Aksident mes dy veturave me targa të Kosovës në Milot
Dy automjete me targa të Kosovës janë aksidentuar të martën në Milot. Aksi...
-
Hyseni: Palestina e mban qëndrimin e Beogradit – Do të ishte hap i gabuar t’ua njohim pavarësinë
Ish-ministri i Jashtëm i Kosovës, Skënder Hyseni, ka thënë se historia e ...
-
Ushtrim i përbashkët i KFOR-it dhe EULEX-it në Mitrovicë për raste krizash
Njësiti i KFOR-it dhe pjesëtarë të misionit të EULEX-it kanë kryer ushtri...
-
Breshër i madh në Suharekë
Reshje të mëdha të shiut të përcjella edhe me breshër kanë përfshirë sot komu...
-
Kurti në takim me Sarrazinin: Këtë vit presim më shumë rezultate nga Procesi i Berlinit
Kryeministri i Kosovës, Albin Kurti, në një postim të bërë në platormën “X” k...
-
A do të heq dorë sot Abdixhiku nga kërkesa për dorëheqjen e Kurtit, duke krijuar mundësinë për zgjedhje të parakohshme?
Dy partitë opozitare, Lidhja Demokratike e Kosovës dhe Aleanca për Ardhmërinë...
-
Kurti: Zvicra, një ndër investitorët kryesorë në Kosovë me 1.1 miliard euro investime
Kryeministri i Kosovës, Albin Kurti, i shoqëruar nga Ministrja për Industri, ...
-
Konjufca uron Afrim Gashin pasi u zgjodh krykuvendar në Maqedoni të Veriut: Mezi pres t’ia nisim bashkëpunimit
Kreu i Kuvendit të Kosovës, Glauk Konjufca, e ka uruar Afrim Gashin pasi ësht...
-
Mashtrohen pensionistët, policia nis hetimet për identifikimin e grupit
Policia e Kosovës, me datë 13 maj 2024 ka pranuar autorizim nga Prokurori kom...
-
Afrim Gashi zgjidhet kryetar i Kuvendit të Maqedonisë së Veriut
Afrim Gashi është zgjedhur kryetar i Kuvendi të Maqedonisë së Veriut. Ai u...