Një tërmet i fuqishëm, me magnitudë 7.8 shkallësh të Rihterit ka shkatërruar pjesë të gjera të Turqisë dhe Sirisë në orët e para të mëngjesit të së hënës, duke u marrë jetën mijëra njerëzve.

E në mesin e atyre që humbën jetën apo edhe mbetën nën rrënoja për disa orë ishin edhe futbollistët.

Kryetari i Federatës së Futbollit të Kosovës, Agim Ademi, në një prononcim për Gazetën Infokus ka folur për gjendjen e futbollistëve kosovarë të cilët luajnë në ligën turke.

I pari i FFK-së, ka thënë se kanë kontaktuar me të gjithë lojtarët dhe të njëjtit janë në gjendje të mirë.

Ai ka konfirmuar se shumica prej tyre janë në Stamboll.

“Kemi kontaktuar me të gjithë dhe të gjithë janë në gjendje të mirë”, ka thënë Ademi për Infokus.

Gjithashtu ai ka njoftuar se ka kontaktuar edhe Federatën turke të Futbollit, duke i shprehur ngushëllime për humbjet që kanë ndodhur si pasojë e tërmetit të fuqishëm.

“Nuk ka asnjë futbollistë të lënduar. Ne kemi kontaktuar edhe me Federatën turke, i kemi shprehë ngushëllime tona dhe kemi tregu që jemi të gatshëm me ndihmu me mundësitë tona. Jemi me ta dhe t’i ndihmojmë me çka do që kemi mundësi sepse ka ndodhë një katastrofë atje”, ka deklaruar Ademi.

Sipas kryetarit të FFK-së, pesë lojtarë të përfaqësueses së Kosovës në futboll janë duke zhvilluar karrierën e tyre në Turqi.

E lidhur me situatën atje ka folur edhe futbollisti kosovar, Florent Hadërgjonaj.

Ekipi ku luan ai, Kasimpasa, luajti në fundjavë në udhëtim kundër Hatayspori, skuadër që vije nga rajoni më i prekur nga tërmeti.

Hadërgjonaj, në një intervistë për “20min.ch”, tregoi se ekipi i Kasimpasas ishte i vendosur në një nga hotelet të prekur nga tërmeti.

“Ekipi ishte pikërisht në mes. Në orën katër të mëngjesit, grupi i ekipit ishte i mbushur plot me mesazhe që u thoshin të largoheshin nga hoteli”, tha ai.

Mirëpo, mbrojtësi kosovar nuk kishte udhëtuar për këtë ndeshje shkaku i lëndimit, teksa kishte qëndruar në Stamboll.

“Shokët e mi të skuadrës ishin shumë me fat. Gjithçka përreth qytetit ishte shembur”, tha 28-vjeçari.

Ky tërmet shkatërrues, përveç dëmeve të shumta materiale ka lënë të vdekur mbi 5 mijë njerëz, derisa institucionet e Kosovës konfirmuan se, tash për tash, në mesin e tyre nuk ka asnjë shtetas të Kosovës./Gazeta Infokus/

Barazo faturën në Meridian Express dhe dhuro për fëmijët SOS Fshatrave

Sponsoruar