Konteksti aktual i Pacifikut  

Shkruan: Agron HOTI
 
Nxitimi i SHBA-së që t’i mbyllë problemet mes BE-së e Rusisë rrënjët i ka në Oqeanin Pacifik, ku SHBA-së do t’i duhet vetë t’i përvjelë mëngët ndaj Kinës që po e rrit ndikimin e saj jo vetëm në Pacifik por edhe në Oqeanin Indian.

Prandaj, SHBA po përpiqet që me çdo kusht t’i mirëmbajë aleancat me Indi, Japoni, Kore Jugore, Australi dhe Azi Juglindore për ta rrethuar e frenuar kështu sa më shumë Kinën në synimet e saj për zgjerim në Oqeanin Pacifik dhe atë Indian. Zgjerimi i Kinës në Paqësor dhe Indian, automatikisht do të thotë ngushtim i interesave të SHBA-së, ose e kundërta.

E ngushtimi i interesave për SHBA do të thotë para se gjithash rrezikim i sigurisë së saj nacionale.

Ashtu siç SHBA-së i ishte dashur që vetë të futej në luftë në Oqeanin Pacifik gjatë Luftës së Dytë Botërore kundër Japonisë, njëjtë do t’i duhet të veprojë edhe sot ndaj Kinës në ujërat e Detit të Kinës Jugore e Tajvan. Nëse SHBA-së i është dashur në Evropë që gjatë Luftës së Dytë Botërore të luftonte drejtëpërdrejtë vetë kundër nazistëve gjermanë, sot kjo në Evropë po i mundësohet nga Ukraina kundër Rusisë, aspekt ky që tregon se përmasat e sfidës aktuale të SHBA-së në Evropë janë më të vogla sesa në Pacifik.

Ndërkohë që në Azi Lindore, SHBA-së – sikurse gjatë Luftës së Dytë Botërore, ashtu edhe sot e nesër – do t’i duhet që vetë t’i përvjelë mëngët, sepse atëherë Japonia e sot Kina përbëjnë sfidë serioze për sigurinë nacionale të SHBA-së në krahun perëndimor të saj, më konkretisht në Pacifik. Zhvillimi i paparë ekonomik në Azi Lindore e Juglindore, tregjet e mëdha atje dhe tentimi i Kinës për t’i gllabëruar ato tregje përbëjnë sfidën kryesore të Perëndimit gjatë tërë shekullit 21.
Për më tepër Pacifiku do të jetë sfida kryesore edhe e sigurisë nacionale të SHBA-së pothuaj gjatë tërë shekullit 21. E paqja atje ruhet nga SHBA duke i mundësuar Japonisë tregje në atë zonë.

Sa më shumë që i ngushtohen tregjet Japonisë në Azi Lindore e Juglindore aq më agresiv do të bëhet ky shtet me potencial të jashtëzakonshëm, fundja SHBA e di më mirë se çdokush nga Lufta e Dytë Botërore se ç’farë çmimi duhet paguar nëse Japonia humb tregjet rajonale, i bllokohet importit i energjisë dhe izolohet.  

Paqja në Azi Lindore e Juglindore ruhet vetëm duke i mundësuar Japonisë tregjet në ato zona, ashtu sikurse ruhet edhe në Evropë vetëm duke i siguruar Gjermanisë tregun evropian. Meqë është Kina që, zhvillimi i hovshëm ekonomik i së cilës, synon prishjen e balancave SHBA-Japoni në Azi Lindore e Juglindore, atëherë një riarmatosje e kontrolluar (nga SHBA) e Japonisë dhe vendeve përreth Kinës (Tajvan, Kore Jugore, Azi Juglindore e Australi) në funksion të forcimit të aleancave në rajonin më të nxehtë në ardhje në glob do të jenë synimet afatgjata të SHBA-së. Dhe kjo e rrit përqendrimin e SHBA-së në këtë zonë më shumë se çdokund në glob. (Vazhdon)

BKS-ja kërkon nga Institucionet që sigurimi për bujqit të bëhët obligativ

Sponsoruar