Drejtori i Zyrës për Kosovën në Qeverinë serbe, Petar Petkoviq, tha se Asociacioni i komunave me shumicë serbe nuk është vetëm dëshirë, por nevojë e të gjithë serbëve në Kosovë.

Këto deklarata Petoviqi i bëri më 9 dhjetor, pasi paraprakisht kryeministri i Kosovës, Albin Kurti, deklaroi para deputetëve të Kuvendit të Kosovës, se nëse Serbia dëshiron që të formohet Asociacioni, duhet të njohë pavarësinë e Kosovës.

“Formimi i Asociacionit të komunave me shumicë serbe nuk është çështje e dëshirës së Albin Kurtit, por obligim i Prishtinës që buron nga Marrëveshja e Brukselit dhe Bashkimi Evropian garantoi zbatimin e kësaj marrëveshjeje të nënshkruar. Fakti që Kurti mburret se ai është kundërshtari më i madh i Asociacionit është çështje për komunitetin ndërkombëtar, por edhe për ekspertët nga fusha të tjera, jashtë politikës”, tha Petkoviq.

Gjatë një seance plenare më 9 dhjetor, Kurti tha se në përgjithësi, në dialogun me Serbinë të ndërmjetësuar nga BE-ja, palët kanë arritur 33 marrëveshje. Ai tha se nuk mund të lejojë që Asociacioni të shndërrohet si marrëveshja më me prioritet.

“Nëse e do Asociacionin fort, atëherë e njeh pavarësinë. Por, ata po thonë për çdo javë se nuk do ta njohin kurrë. Ky fakt tregon se ata nuk e duan Asociacionin. Neve nuk na duhet, ata nuk e duan, nuk kemi pse i japim kaq shumë prioritet”, tha Kurti.

Kosova dhe Serbia, në kuadër të Marrëveshjes së parë të Brukselit, më 2013 arritën pajtim për formimin e Asociacionit të komunave me shumicë serbe. Dy vjet më vonë, u arrit edhe Marrëveshja mbi parimet për themelimin e këtij asociacioni.

Gjykata Kushtetuese e Kosovës tha se disa pika të marrëveshjes nuk janë në përputhje me Kushtetutën dhe shtoi se ato mund të harmonizohen me akte nënligjore nga Qeveria e Kosovës.

Serbia insiston që Asociacioni të formohet, por Qeveria e Kosovës është shprehur kundër një asociacioni njëetnik.

Çfarë parasheh Asociacioni?

Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.

Sipas marrëveshjeve, Asociacioni ka për qëllim të përfaqësojë interesat kolektive të këtyre komunave, veçmas në fushën e arsimit, shëndetësisë, planifikimit urban dhe rural si dhe të ekonomisë.

Marrëveshja e vitit 2013 për Asociacionin thekson se ai do të krijohet me statut dhe strukturat e tij, mbi bazën e statutit të Asociacionit të komunave të Kosovës.

Po ashtu thuhet se Asociacioni do të ushtrojë edhe përgjegjësi të tjera shtesë, varësisht se si delegohen nga autoritetet qendrore dhe që do të ketë një rol përfaqësimi tek autoritetet qendrore.

Sipas marrëveshjes së vitit 2015 për parimet për krijimin e Asociacionit, objektivat kryesorë të Asociacionit janë: ushtron vështrimin e plotë për zhvillimin e ekonomisë lokale; ushtron vështrimin e plotë në fushën e arsimit; ushtron vështrimin e plotë për përmirësimin e shëndetësisë lokale primare e sekondare dhe përkujdesjen sociale; ushtron vështrimin e plotë për koordinimin e planifikimit urban dhe rural; aprovon masa për përmirësimin e kushteve lokale të jetesës për të kthyerit në Kosovë; zhvillon, koordinon, lehtëson aktivitete hulumtuese dhe zhvillimore; promovon, shpërndan, dhe avokon për çështjet me interes të përbashkët të anëtarëve të tij dhe i përfaqëson ata përfshirë tek autoritetet qendrore; vendos marrëdhënie dhe hyn në marrëveshje bashkëpunimi me asociacionet tjera të komunave, vendore dhe ndërkombëtare, etj.
/REL

Po, Po 31 Vetura Dacia Logan shpërblim për konsumator nga ETC

Sponsoruar