Sport

Interi duhet të presë për Diego Simeonen

Autori: Gazeta inFokus 09:47 | 22 January 2019

Diego Simeone gjatë dy viteve të fundit është shprehur shpesh se një ditë do të marrë drejtimin e Interit, skuadër tek e cila është aktivizuar edhe si futbollist dhe ka kujtime shumë të bukura.

Megjithatë mbërritja e argjentinasit në Milano do të shtyhet edhe për disa vite, pasi aktualisht Simeone është i lumtur tek Atletico e Madridit dhe është gati të rinovojë kontratën me Los Colchoneros.

Lajmin e ka konfirmuar “AS”, që raporton se përfaqësuesit e teknikut argjentinas gjatë orëve të fundit kanë arritur një marrëveshje me drejtuesit e klubit të Atletico Madridit, për një rinovim, që do ta zgjaste kontratën mes palëve edhe për një vit tjetër.

-Advertisement-

Kështu, skadimi i kontratës, i parashikuar të ndodhte në vitin 2020, tashmë do të ndodhë një vit më pas, në 2021.

I njëjti burim informacioni zbulon edhe detajin që ndikoi fuqishëm në këtë marrëveshje rinovimi.

Sipas “AS”, është pikërisht blerja e Alvaro Moratës nga ana Atletico Madridi, një transaksion që pritet të zyrtarizohet, faktori që ndikoi në rinovimin e Simeones.

Tashmë “Colchoneros” po presin fillimin e muajit shkurt, për të njoftuar zyrtarisht rinovimin e atij që tashmë është trajneri historik i Atletico Madridit.

Subscribe në YouTube: GAZETA INFOKUSI
Intervistë: Dr. Gorazd Konjanovski – Klinika Zhan Mitrev ka luajtur një rol kyç në vendosjen e themeleve në kardiokirurgji dhe…

Të tjera