Fokus

Asamblistja e PDK-së me dy paga: Një në Skënderaj, një në Ministrinë e Inovacionit (Dokument)

Autori: Sylejman Sylejmani 17:13 | 07 June 2019

Në shtator të vitit të kaluar me ardhjen në pushtet të koalicionit PDK-AAK-NISMA, Kosovës iu shtua një ministri e re.

Vendi për herë të parë u bë me Ministri të Inovacionit, të cilën ia besuan ta udhëheqë Besim Beqaj i PDK-së, shkruan Gazeta inFokus.

Megjithatë, ministrinë e re mësohet se po e e përcjellin shumë telashe në punësime e avancime.

-Advertisement-

Gazeta inFokus ka siguruar dëshmi nga burime të sigurta brenda këtij institucioni për disa raste, për të cilat Gazeta do të raportoj ditëve në vijim.

Njëri prej rasteve është punësimi i Fitore Mangjollit si asistente profesionale e sekretarit të përgjithshëm të Ministrisë së Inovacionit, Hajriz Koca.

Mangjolli është punësuar në këtë pozitë, ndërsa mbanë edhe postin e asamblistes së PDK-së, në Komunën e Skënderajt.

Vetë ajo e ka konfirmuar se merr pagë nga këto dy pozita shtetërore, në raportimin e pasurisë, të cilën Mangjolli e ka bërë në Agjencinë Kundër Korrupsionit.

 

 

Nga puna që bën në ministri, ajo ka deklaruar se merr pagë vjetore prej 4 mijë eurove, kurse nga puna si asambliste në Kuvendin Komunal të Skënderajt, ka thënë se merr 2 mijë e 700 euro pagë vjetore neto.

Për këtë çështje, Gazeta inFokus ka rreth dy javë që është duke pritur përgjigje nga Ministria e Inovacionit.

Megjithatë, përkundër shumë përpjekjeve dhe disa premtimeve, akoma nuk ka marrë asnjë përgjigje.

InFokus ka kontaktuar edhe personalisht me Fitore Mangjollin, mirëpo ajo nuk ka dashur të flasë duke sugjeruar që të priten përgjigjet e ministrisë.

Mbajtjen e disa pozitave shtetërore e ka kritikuar në disa raste, Agjencia Kundër Korrupsionit.

Gazeta inFokus është duke pritur arsyetimin e ministrisë edhe për persona të cilët marrin pagë pa u paraqitur fare në punë, punësime pa kritere e avancime të kundërligjshme, për të cilët do të raportohet ditëve në vijim. /Gazeta inFokus/

 

 

Subscribe në YouTube: GAZETA INFOKUSI

Të tjera

Fokusi

fokus