Lajme

Pacientët me dializë paguajnë taksi për transport nga Deçani për Pejë

Autori: Gazeta inFokus 21:49 | 27 January 2018

Pacientët e sëmurë me dializë ankohen për kushtet e transportit nga Deçani për në spital të Pejës.

Tri herë në javë, pacientët që kanë nevojë për dializë udhëtojnë nga Deçani drejt Spitalit të Pejës për ta marrë terapinë e tyre, mirëpo ata ankohen me kushtet e automjetit transportues të siguruar nga komuna.Pacienti Dervish Demhasaj tha për Kallxo.com se kombi me të cilin udhëtojnë tri herë në javë nuk i ka kushtet e mira për bartjen e të sëmurëve, sidomos gjatë ditëve të ftohta të dimrit.

“Na jemi me të diskriminuarit në komunë të Deçanit. Këqyre çfarë kerri kem, as nuk munden me hyp pacientët në të. E kanë paguar taksin (pacientët tjerë) se nuk munden me hypë e me dalë, s’munden me nejtë prej ftohtit, klima nuk i punon, as dorën nuk ta nxeh. Shiu qaty na pik në midis, kqyri karriget”, u ankua Demhasaj.

-Advertisement-

Ai tha së transporti me të cilin udhëtojnë u është ndarë nga komuna e Deçanit por, sipas tij, ai nuk i plotëson kushtet për bartjen e pacienteve për në spital.

Edhe pacienti tjetër, Riza Çeku, u ankua për kushtet e automjetit transportues që i bartë nga Deçani për Spitalin Regjional të Pejës.

“Ky as nuk ka nxehje, as nuk ka karrige, as s’ka ftohje, as amortizim”, tha Çeku.

Sipas tij, këto kushte po ndikojnë edhe në shëndetin e tyre, sidomos pas marrjes se terapisë.

Edhe përkundër premtimeve të dhëna gjatë fushatës zgjedhore për zgjidhje të problemit, pacientët thonë se asgjë nuk ka lëvizur.

Në anën tjetër, drejtori i Qendrës Kryesore të Mjekësisë Familjare në Deçan, Selmon Berisha, tha se janë në dijeni për shqetësimin e pacientëve në dializë.

Ai tha se nga 20 pacientë sa janë gjithsej në këtë komunë, 14 prej tyre u paguhen 50 litra derivate për udhëtim, kurse 6 prej tyre udhëtojnë me transportin e siguruar nga komuna për ta.

Berisha tha se transporti aktual nuk është në gjendje aq të keqe, mirëpo premtoi se brenda pak kohe do sigurohet një automjet i ri.

E rreth këtij problemi, drejtori i QKMF-së në Deçan tha se ka biseduar me Kryetarin e Komunës se Deçanit, Bashkim Ramosaj, nga i cili theksoi se ka marrë mbështetje.

“Menjëherë projekti i parë të cilin ne do ta tenderojmë është kombi për pacientët të cilët janë në dializë. Domethënë është projekti i parë në shkurt. Ne do t’i fillojmë procedurat e tenderimit, e sa do të zgjatë ajo nuk varet prej neve”, tha Berisha.

Subscribe në YouTube: GAZETA INFOKUSI