Pas përfundimit të dëshmisë së Fadil Gecit, dëshmitari i radhës në gjykimin ndaj ish-krerëve të UÇK-së është Nuredin Ibishi i njohur me nofkën komandant “Leka”.

Fillimisht, pyetjet për këtë dëshmitar i nisi prokurorja Silvia D’Ascoli, e cila po prezantojë dokumente që janë deklarata të mëhershme të Ibishit të dhëna më parë për autoritetet e drejtësisë.

“Jam mundu ta them të vërtetën, e nëse ka ndonjë mospërputhje do të mundohem ta sqaroj”, tha Ibishi.

Sipas kryetarit të trupit gjykues, dëshmia e Ibishit do të zgjasë rreth një a po dy ditë, e që prej kësaj kohe, 2 orë e gjysmë janë paraparë për pyetje të ZPS-së. Ndërsa, për mbrojtjen e viktimave rreth 20 minuta. E, për mbrojtjen e të akuzuarve rreth gjashtë orë.

Por, seanca u ndërpre pa planifikim me arsyetimin se do të bëhet një pushim i shkurtër.

“Na duhet të bëjmë një pushim të shkurtër. Nxjerrni dëshmitarin. Dëshmitar do të bëjmë një pu…”, tha kryetari i trupit gjykues Charles Smith III.

Debat në mes Gecit dhe avokatit të Thaçit

Për të tretën ditë, Fadil Geci ka dhënë dëshminë para Dhomave të Specializuara në Hagë në rastin ndaj ish-krerëve të Ushtrisë Çlirimtare të Kosovës. Gjatë intervistimit pati një debat mes Gecit dhe avokatit të Hashim Thaçit, Luka Mishetiq.

“A mendonte se ZPS-ja e ka rritë armiqësinë e tij ndaj Thaçit dhe se kjo armiqësi është bërë më e madhe sesa ka qenë më përpara me prezantimin e kësaj deklarate”, pyet Luka Misetiq, avokat i Thaçit.

“Mendoj që ki gabim, punën më të mirë që e ka ba është që na i ka ofrua krejt mundësitë e mundshme që me e pa me sytë tu çka qysh. Është për mu vlerësua për punën e mirë që e ka ba. E kundërta e asaj që po thu ti. Nuk mendoj që si ekspert duhet me e thanë atë. Nuk i bën mirë as të mbrojturit tënd për me e thënë atë. I bën dëm”, përgjigjet Fadil Geci, dëshmitar.

Misetiq, tha se me mbrojtjen e klientit tij merret vetë. “Ti duhet të merresh me gjërat që do ta na tregosh që i di vetë. Me shumë vlerë ky koment. Faleminderit”, tha ai.

Gecit iu prezantua edhe një demantim nga Ramë Buja për një deklaratë që dëshmitari Geci dha gjatë seancës.

“A jeni në dijeni që Ramë Buja nuk ka qenë pjesë e shtabit të përgjithshëm të UCK-së kur është bërë komunikata në tetor 98”, ka pyetur avokati.

Kurse dëshmitar tha se “Ramë Buja është një marksist-leninist dhe po ju them edhe sot që është bashkëpunëtor i ngushtë i shokëve këtu”.

Ndërkohë, Geci pati një kritikë nga avokati i Jakup Krasniqit.

Aiden Ellis, avokat i Jakup Krasniqit, i tha atij se ‘ka ardhur në gjyq dhe vendosët që të jepni dëshminë në seancë publike për deklarata politike e ajo që keni thënë për Jakup Krasniqin është e pavërtetë’.

Kurse Geci, tha se e ka ‘thanë të vërtetën dhe vetëm të vërtetën. “Çdo fjalë e imja është 200% e vërtetë dhe vetëm e vërtetë, e ti e ki gabim, po e ke të drejtën tënde si unë”, ka theksuar ai.

Shkolla Finlandeze lanson programin IMPACT: Tani edhe në gjuhën shqipe, me çmim të përballueshëm

Sponsoruar