Zëdhënësi i zyrës së kryeministrit Albin Kurti,  Përparim Kryeziu ka reaguar pasi Kosova u rendit 19 vende më poshtë se sa vitin e kaluar në indeksin e lirisë se mediave.

Sipas Kryeziut janë dy çështje që kanë ndikuar që Kosova të ulet kaq poshtë në këtë indeks, e ato janë raportimet e gazetarëve nga veriu e sulmet ndaj tyre dhe rasti i Klan Kosovës.

I pari i zyrës për informim në qeverinë e Kurtit ka thënë se Klan Kosova ka bërë një shkelje ligjore dhe se ky ka qenë qëllimi i kërkimit të llogaridhënies, e që sipas tij edhe çështja e Klan Kosovës është bërë publike nga vetë mediat.

Kryeziu duke aryetuar këtë renditje e cila vie në kohën e qeverisjes së Kurtit ka shtuar se viti i fundit nuk ka qenë i lehtë për Kosovën, marrë parasysh edhe situatat e krijuara në veri, shkruan Gazeta Infokus.

Reagimi i plotë:

“Pas dy viteve progres të theksuar në Indeksin e Lirisë të Mediave të RSF, renditja e sivjetme nuk duhet të na dekurajoj sepse nuk ka qenë një vit i lehtë, sidomos në aspektin e sigurisë marrë parasysh ngjarjet në veri. Përkundrazi, përballë një rreziku global të cenimit të lirisë së shtypit, besueshmërisë dhe pavarësisë së saj, është koha e duhur për të rikujtuar dhe ushtruar rolin që secili ka në mbrojtjen dhe fuqizimin e mediave të pavarura dhe profesionale, si një prej shtyllave kryesore të shoqërive demokratike.

Në krahasim me raportin e vitit të kaluar, duket që janë dy çështje kryesore që kanë diktuar renditjen e Kosovës në Indeksin e Lirisë së Mediave këtë vit.

E para, sulmet ndaj gazetareve e gazetarëve nga bandat kriminale të strukturave paralele të Serbisë në katër komunat në veri në mes muajve maj-korrik 2023, e që në raport qenkan përshkruar me një gjuhë neutrale: “sulmet ndaj gazetarëve janë rritur gjatë tensioneve politike ndërmjet Prishtinës dhe Beogradit”.

E dyta, denoncimi publik që Klan Kosova sh.p.k është regjistruar në Kosovë me dokumente të Serbisë dhe llogaridhënia ligjore që i është kërkuar nga institucionet e vendit si pasojë, të cilin raporti e paska përshkruar si në vijim: “Klan Kosova ka qenë subjekt i ngacmimeve administrative (en. administrative harassment) nga Qeveria e Kosovës”.

Në veri Polica e ka bërë të mirën e mundshme që të ofrojë siguri për të gjithë. Veriu i rrezikshëm ka qenë edhe për vetë Policinë e Kosovës. Një vit pas, atje ka më shumë siguri për raportim të mediave nga terreni se që ka pasur në të kaluarën. Ky nuk është sukses vetëm i institucioneve të sigurisë, por edhe i gazetarëve e gazetareve dhe mediave që përmes raportimeve të tyre të guximshme e shpalosën të vërtetën e ngjarjeve të majit dhe qershorit – duke kontribuar kështu drejtpërdrejt në mbrojtjen e kushtetutshmërisë.

Sa i përket çështjes së Klan Kosovës sh.p.k, aty është evidentuar një shkelje ligjore. Pas denoncimit publik, Klan Kosova sh.p.k ka përmirësuar të dhënat në regjistrim, duke pranuar kështu që faktikisht ka pasur shkelje gjatë regjistrimit fillestar. Ndryshe nuk kishte pse t’i përmirësonte. Edhe këtu, mediat kanë pasur një rol kyç në denoncimin publik të rastit, duke kontribuar edhe këtu në respektimin e kushtetutshmërisë”.

Kujtojmë se deri më tash të gjitha raportet ndërkombëtare kanë kritikuar qasjen e qeverisëKurti ndaj gazetarëve dhe mediave, madje janë theksuar tendenca dhe fushatat denigruese kundrejt gazetarëve të bëra edhe nga vetë kryeministri, Albin Kurti./Gazeta Infokus/

Hej, hej, hej, erdhi Black Friday me zbritje deri në 75% në Comodita Home

Sponsoruar