Qytetarë të shumtë u ndanë të pakënaqur me faturat e energjisë elektrike për këtë muaj, ku disa prej tyre zgjodhën të bëjnë ankesë zyrtare. Kryeministri Albin Kurti tha se nuk ka shtrenjtim të energjisë elektrike, por nëse ka fatura të fryra duhet të drejtohen tek KESCO dhe ZRrE. Në Zyrën e Rregullatorit për Energji, deri më tani janë rreth 12 ankesa zyrtare.

Jo pak qytetarë që pretendojnë se në muajin dhjetor kanë marrë fatura të fryra të energjisë elektrike, shprehen të indinjuar për këtë ndryshim, prandaj iu drejtuan KEDS-it për të të bërë ankesë zyrtare. Pati edhe të pakënaqur me faturat e dhjetorit, por që pranuan t’i paguajnë.

Pas diskutimeve të shumta për këtë çështje, reagoi edhe kryeministri, Albin Kurti, i cili mohoi të ketë shtrenjtim të rrymës.

-Advertisement-

“Nëse ka fatura të fryra, KESCO dhe ZRrE janë adresa të cilat duhet t’i adresojnë me seriozitet edhe me shpejtësi të gjitha ankesat, mirëpo nuk ka shtrenjtim të energjisë elektrike. Kur ka konsum më të lartë natyrisht se ka edhe faturë më të lartë. Shtrenjtim të energjisë elektrike nuk ka”, tha ai.

Zëdhënësja e KESCO-s, Margarita Rashiti, shpjegon arsyet e ndryshimit të faturave më të shtrenjta për muajin dhjetor.

“Rrjedhimisht qytetarët janë duke paguar aq sa kanë shpenzuar, nga afër 500 mijë konsumatorë të cilët deri në momentin që ne po flasim u janë lexuar njehësorët e tyre, 14% prej tyre kanë pranuar faturë mbi 100 euro, në ndërkohë 86% prej tyre kanë pranuar fatura nën 100 euro. Pra po flasim për një % shumë të vogël të konsumatorëve që kanë pranuar fatura mbi 100 euro sepse aq kanë shpenzuar, po në anën tjetër ata që e kanë tejkaluar bllokun e parë mbi 800kWh atëherë padyshim që tarifa e lartë dhe e ultë është më e lartë sesa blloku i parë…”, tha ajo pë Rtv21.

Ndërkaq, në Zyrën e Rregullatorit për Energji, deri më tani janë dorëzuar rreth 12 ankesa zyrtare në lidhje me faturat e dhjetorit.

“Për sa i përket ankesave per faturat e fundit, ju informojmë se deri me sot janë pranuar 12 ankesa te konsumatorëve. ZRRE-ja, ka një proces për ankesat e konsumatorëve që konsumatorët e përdorin gjatë gjithë kohës për zgjidhjen e çështjeve në lidhje me leximin e njehsorëve, faturimin, dhe çështje të tjera. Çdo ankesë e konsumatorëve do të zgjidhet sipas procedurës për zgjidhjen e ankesave në sektorin e Energjisë”.

Afati për ankesa të qytetarëve për faturat e muajit dhjetor 2023, në KEDS edne nuk është mbyllur.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-