Kryenegociatori serb për dialog me Kosovën, Petar Petkoviq, ka pretenduar se Asociacionin i komunave me shumicë serbe “përfaqëson të vetmin mekanizëm për mbijetesën e komunitetit serb në Kosovë dhe se refuzimi i Kosovës për të përmbushur obligimet e saj nga dialogu për plot dhjetë vjet i mundësoi drejtpërdrejt kryeministrit të Kosovës Albin Kurti kryerjen e terrorit, persekutimit dhe veprimeve përshkallëzuese” kundër, siç e quan ai “popullit” serb”.

Petkoviq, para takimit të radhës në Bruksel në dialogun Kosovë-Serbi, ka pretenduar se Asociacioni “nuk do të jetë kurrë një organizatë joqeveritare në kuadër të së cilës duan ta vendosin përfaqësuesit e disa përfaqësive perëndimore në Prishtinë”, transmeton Paparaci.

“Asociacioni është korniza dhe garantuesi më konkret për ruajtjen e të drejtave kolektive dhe individuale, si dhe kompetencave ekzekutive të negociuara në vitet 2013 dhe 2015 për serbët e Kosovës në çështjet më të rëndësishme sociale, ekonomike, politike, kulturore, zhvillimore, ekonomike dhe të sigurisë“, ka pretenduar Petkoviq.

-Advertisement-

Ai ka theksuar se të gjitha marrëveshjet për statusin e, siç e quan ai, të “bashkimit të komunave serbe” dhe kompetencat të cilat “tashmë janë vendosur për komunitetin serb në Kosovë, sipas marrëveshjeve të viteve 2013 dhe 2015, duhet të jenë në përputhje me Kushtetutën e Republikës së Serbisë”.

“Kjo është pikërisht ajo që presidenti ynë, Aleksandar Vuçiq, disa herë e ka thënë qartë dhe pa mëdyshje para zyrtarëve ndërkombëtarë, përfshirë takimin e fundit në Bruksel me liderët evropianë. Për ne Kushtetuta e Republikës së Serbisë është e shenjtë dhe në Kosovë ende është në fuqi Rezoluta 1244 e Këshillit të Sigurimit të OKB-së dhe asnjë konferencë mediatike, e as duke iu referuar “të ashtuquajturës” Gjykatë Kushtetuese të Kosovës, e cila nuk ka asnjë kredibilitet jashtë kabineteve individuale apo të ambasadave të huaja, nuk mund ta pezullojë apo anulojë këtë“, ka pretenduar Petkoviq në propagandën e tij para zgjedhjeve në Serbi, të cilës si duket as vet nuk i beson. Por ka vazhduar ta kryej detyrën e tij të servilit, duke e lartësuar liderin e tij suprem duke thënë se “një gjë duhet të jetë e qartë për të gjithë, e ajo është se presidenti ynë Aleksandar Vuçiq nuk ka reaguar asnjëherë ndaj presioneve, pa marrë parasysh se nga cila anë kanë ardhur dhe sado të dhunshëm kanë qenë. Dhe ai do të vazhdojë të luftojë fuqishëm për interesat e “popullit serb” në Kosovës”

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-