Viti i ri shkollor pritet të fillojë me kohë (Më 1 shtator 2023), për dallim nga viti i kaluar që kishte nisur me më shumë se një muaj vonesë. Kjo pasi që Sindikata e Bashkuar e Arsimit, Shkencës dhe Kulturës (SBASHK) nuk do të mbajë grevë, siç kishte ndodhur vitin e kaluar, përkundër pakënaqësive të shumta që kanë.

Kryesindikalisti i arsimit, Rrahman Jasharaj, thotë se nuk e kanë ende ndonjë kërkesë për grevë.“Për momentin nuk mundem të them gjë, edhe pse nëse i marrim diskutimet e fundit që i kemi pasur me udhëheqësit sindikal, nuk është përmendur ndonjë kërkesë nga terreni për grevë. Për grevë nuk mund të them se do të ketë për momentin”, deklaron ai.

Jasharaj thotë se do të insistojnë tek pozita e opozita që ta ngrisin koeficientin e pagave, i cili është 105 €.

“Ajo që di dhe që jemi marrë vesh është që me t’u kthyer deputetët nga pushimi, ne do të bëjmë kërkesa tek pozita dhe opozita, që ata të angazhohen që të ngritet vlera e koeficientit dhe të angazhohen që të bëhen përmirësimet e duhura te ligji për skemat pensionale të financuara nga shteti”, u shpreh ai.

Kryesindikalisti Rrahman Jasharaj thotë se një pjesë e madhe e arsimit është e pakënaqur me pagat. Ai thotë me Ligjin e Pagave, administrata e universiteteve nuk kanë rritje fare.

“Një pjesë e madhe e sistemit arsimor, vërehet një ngritje e pagës nga Ligji i Pagave, e kam fjalën në çerdhe dhe punëtorët teknik janë ndarë pak më të kënaqur. Te ata nuk arrihet as 100 euro rritje, të pakënaqur plotësisht janë punëtorët e shkollave të mesme, dhe me arsyen më të madhe, tepër të pakënaqur janë administrata në universitetet e Kosovës, ngase tek ata nuk kanë rritje fare”, deklaroi ai.

Dialog mes sindikatës së arsimit dhe Qeverisë nuk ka.Jasharaj thotë se që nga viti i kaluar nuk janë takuar me ministren e Arsimit, Arbërie Nagavci.

“Më e keqja, më e madhja, jo vetëm për ne, por edhe për të tjerët, dhe ne e kemi thënë publikisht, se Qeveria Kurti nuk ka dialog, nuk dëshiron dialog me sindikatat. Që nga greva e shtatorit e deri në momentin që po flasim, edhe pse kemi bërë kërkesa, i vetmi takim me zonjën Nagavci ka qenë një takim pak më tepër solemn, me disa buzëqeshje kogja artificiale nga ne dhe ata. Por takime të ndërsjella, të punës me ministren e arsimit nuk kemi pasur, dhe kjo ndodh për shkak të ministres Nagavci, por edhe me ministra të tjerë nuk ka pasur takime”, thotë ai.

Ai thotë se Qeveria Kurti po vepron “kokë më vete.

“Nuk ka takime, nuk ka dialog, qeveria po bënë ashtu siç po i teket, ne do të insistojmë me deputetët, dhe të pozitës, dhe të opozitës, që ta ngrisim vlerën e koeficientit, sepse po them edhe në arsim, edhe në sektorë të tjerë, shumica janë të pakënaqur”, deklaroi ai, për frontonline.

Përndryshe, më 2022, viti i ri shkollor i pati gjetur nxënësit në shtëpi, e mësimdhënësit në grevë, kjo për shkak të mosplotësimit të kërkesave të tyre.

Përveç mësimdhënësve, në grevë kanë qenë edukatorët në kopshte publike, punëtorë të administratës publike, shërbyesit civilë në institucionet lokale dhe qendrore të Kosovës.

Keiretsu Forum Southeast Europe dhe BKT Kosova, një bashkëpunim i guximshëm për herë të parë në llojin e tij, në…

Sponsoruar