Viti 2021 është koha kur Kosova përjetoi krizën më të madhe energjetike ndonjëherë. E këtë e dëshmon edhe dokumenti që ka siguruar Gazeta Infokus e që tregon për rritjen marramendëse të importit në këtë vit.

Dokumenti që ka siguruar Infokusi tregon lëvizjen e shifrës së blerjes të energjisë elektrike ndër vite në Kosovë, që nga viti 2000.

Mbi 156 milionë euro ka shpenzuar Kosova në importin e energjisë elektrike vetëm në vitin 2021 duke shënuar kështu krizën më të madhe me energji elektrike. Kjo shifër  e blerjes së energjisë në vitin 2021 është trefishuar në krahasim me atë të vitit 2020. Në vitin 2020 Kosova shpenzoi vetëm 41.8 milionë euro në import të energjisë elektrike, shkruan Gazeta Infokus.

-Advertisement-

Kujtojmë se nga viti 2013 kur edhe u shit distribucioni i energjisë elektrike, importin në Kosovë e bën Kompania Kosovare për Distribuim me Energji Elektrike.

Ndërsa ende nuk dihet se sa është importi për 6 mujorin e parë të vitit 2022, duke qenë se kriza me energjinë elektrike dhe prodhimin e saj është thelluar edhe më shumë.

Kosova në dy vitet e fundit ka shënuar vitet më të rënda sa i përket krizës me energjinë elektrike. Këtë vit reduktimet kanë filluar qysh në verë e është paralajmëruar një dimër goxha i vështirë sa i përket energjisë.

Sipas pushtetit të gjitha këto probleme erdhën si pasojë e problemeve me remontin e termocentraleve në Korporatën Energjetike të Kosovës. Deri të enjten Kosova u përball me reduktime të shumta gjatë gjithë ditës, ani pse ishte njoftuar që reduktimet do jenë 6 orë me energji elektrike dhe 2 pa energji, në realitet reduktimet ishin edhe më të ashpra.

Vetëm dy ditë pasi filluan reduktimet në gjithë Kosovën nga ministria e Ekonomisë u njoftua se kanë arritur një marrëveshje me Korporatën Energjetike të Shqipërisë dhe se kjo e fundit do t’i dalë në ndihmë Kosovës në furnizimin me energji elektrike në mënyrë që të mos ketë reduktime.

Por pavarësisht kësaj reduktimet vazhduan përsëri. Ndërsa dje përmes një njoftimi nga KEDS kanë thanë se nuk do të ketë më reduktime për shkak se tashmë ka përfunduar edhe remonti i dy blloqeve prodhuese të energjisë elektrike, B2 dhe A3 të termocentralit Kosova A dhe Kosova B.

“Stabilizohet situata e furnizimit me energji elektrike pas rikthimit të bllokut B2 dhe A3. Njoftojmë konsumatorët se janë ndalur kufizimet e energjisë elektrike me hyrjen në prodhim të bllokut B2 dhe A3, pasi që gjendja është stabilizuar për momentin”, ka njoftuar KEDS.

Sipas këtij njoftimi të bërë të enjten aktualisht, KEK ka në funksion të prodhimit katër blloqe: A3, A4, B1 dhe B2, të cilat në total prodhojnë afro 800 MWh energji elektrike./Gazeta Infokus/

Afro 1 miliardë euro energji elektrike importoi Kosova në 20 vite

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-