Presidenti i Shteteve të Bashkuara, Joe Biden, i tha presidentit rus, Vladimir Putin, se pushtimi i Ukrainës nga ana e Rusisë “do të shkaktonte vuajtje të mëdha për njerëzit” dhe “do të zvogëlonte pozitën e Rusisë” në botë.

Shtëpia e Bardhë bëri këtë njoftim pas bisedës telefonike që zhvilluan dy presidentët të shtunën.

Biden përsëriti se Shtetet e Bashkuara dhe aleatët e tyre do të “përgjigjeshin me vendosmëri” nëse Rusia pushton.

-Advertisement-

Ai tha se reagimi i aleatëve do të kishte “kosto të shpejta dhë të rënda për Rusinë”.

“Shtetet e Bashkuara mbeten të përgatitura për t’u angazhuar në diplomaci, por ne jemi po aq të përgatitur për skenarë të tjerë”, paralajmëroi Biden.

Telefonata, e cila zgjati rreth një orë, nuk shkaktoi ndonjë ndryshim thelbësor në tensionet mes Rusisë dhe Ukrainës, tha një zyrtar i lartë i administratës amerikane, që foli me gazetarët.

Mbetet e paqartë nëse Rusia është e gatshme të ndjekë rrugën diplomatike, tha ai, duke shtuar se Rusia mund të vazhdojë me veprime ushtarake.

Rusia, tash e sa muaj, ka grumbulluar mbi 100,000 trupa në kufi me Ukrainën, por ka mohuar se ka plane për pushtim.

Sipas Rusisë, NATO-ja është ajo që paraqet kërcënim për sigurinë e saj.

Shteti rus ka kërkuar garanci nga NATO-ja se do të ndalojë zgjerimin drejt lindjes dhe se nuk do të pranojë në radhët e saj vendet ish-sovjetike, përfshirë Ukrainën.

SHBA-ja dhe NATO-ja kanë refuzuar kërkesat ruse për zgjerimin, por kanë ofruar rrugë diplomatike për zgjidhjen e krizës.

Sipas një komunikate të lëshuar nga Kremlini, Putin i tha Bidenit se përgjigjja e SHBA-së ndaj kërkesave ruse për sigurinë, nuk ka marrë parasysh shqetësimet e Moskës, andaj ajo “do të përgjigjet së shpejti”.

Para se të fliste me Bidenin, Putin zhvilloi një bisedë telefonike edhe me presidentin e Francës, Emmanuel Macron.

Në një përmbledhje të kësaj telefonate, Kremlini tha se është bërë pak përparim drejt zbutjes së tensioneve.

Sipas Presidencës franceze, në anën tjetër, Macron dhe Putin “shprehën dëshirën për të vazhduar dialogun”.

Thirrjet u organizuan pasi zyrtarët amerikanë thanë të premten se Rusia ka grumbulluar trupa të mjaftueshme pranë Ukrainës, për të nisur një pushtim të madh dhe u kërkuan të gjithë qytetarëve amerikanë që të largohen nga ky vend brenda 48 orësh.

Thirrje të ngjashme për evakuim lëshuan edhe vende të tjera, përfshirë Shqipërinë.

Pentagoni tha se sekretari amerikan i Mbrojtjes, Lloyd Austin, foli në telefon me homologun e tij rus, Sergei Shoigu, për situatën e krijuar. Austin po ashtu urdhëroi ripozicionimin e përkohshëm të trupave të Gardës Kombëtare jashtë Ukrainës.

“Ky ripozicionim nuk nënkupton ndryshime në vendosmërinë tonë për të mbështetur Forcat e Armatosura të Ukrainës, por do të ofrojë fleksibilitet në sigurimin e aleatëve dhe frenimin e agresionit”, tha zëdhënësi i Pentagonit, John Kirby.

Të shtunën, edhe sekretari amerikan i Shtetit, Antony Blinken, i tha homologut të tij rus, Sergei Lavrov, se rruga diplomatike për zgjidhjen e krizës mbetet e hapur, porse kjo kërkon nga Moska “të shtensionojë [situatën]”./rel/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-