Të gjithë “kokat” më të mençura të Kosovës, do të bëhen bashkë në një vend.

Intelektualët e vendit më të varfër në rajon, pritet t’i bashkojë Parku Inovativ në Prizren me fillim të vitit 2019, kohë kur edhe zyrtarisht ky kamp do i dorëzohet Qeverisë së Kosovës.

Njerëz nga teknologjia, ndërmarrësia, shkenca, bujqësia, turizmi e kultura, do të trajnohen në këtë kamp. Por, se nga kush do të financohet ky park ende nuk dihet.

-Advertisement-

Kështu ka konfirmuar për Infokusin vet zëdhënësja e Qeverisë, Donjeta Gashi.

“Në kuadër të Marrëdhënieve bilaterale që do të zhvillohen në mes të dy Shteteve do të caktohet edhe forma e financimit në të ardhmen”, ka thënë Gashi për Infokusin.

Ky projekt, sipas Zyrës së Kryeministrit ka për qëllim punësimin, krijimin e një ambienti afarist, përdorimin efikas  objekteve ekzistuese, stimulimin e turizmit, krijimin e masave për efikasitet të energjisë dhe mbrojtje të mjedisit, hapësirë për promovimin e inovacionit e hapësirë për aktivitete kulturore, angazhim të të rinjve dhe aktivitetet e organizatave të shoqërisë civile.

Në objektin ku pritet të trajnohet këta pjesëmarrës, aktualisht janë të vendosura Forcat e Armatosura Gjermane. Por, objekti pritet të lirohet në fundvit.

“Forcat e Armatosura Gjermane do t’i lirojnë objektet e KFOR-it në Prizren deri në fund të vitit 2018. Në fillim të vitit 2019 prona në të cilën gjendet kampi do t’i dorëzohet Qeverisë së Kosovës”, ka thënë Gashi për Infokusin.com.

Krejt kjo pasi që në vitin 2016 Qeveria e Kosovës dhe Ministria  Federale për Bashkëpunim Ekonomik dhe Zhvillim të Gjermanisë u dakorduan që të shqyrtohet mundësia e shfrytëzimit të hapësirës në një zonë ekonomike.

Nga zyra e Kryeministrit thonë se Parku Kosovaro-Gjerman për Inovacion dhe Trajnim në Prizren do të jetë një qendër lidhëse civile për bashkëpunimin  e ardhshëm në mes dy shteteve për zhvillimin social dhe ekonomik të Kosovës.

Deklarojnë se duke u bazuar në studimin e fizibilitetit dhe prioritet e Qeverisë së Kosovës  janë identifikuara pesë fusha për implementim në të ardhmen, si : inovacioni, arsimi, shkenca, bujqësia dhe turizmi.

Për marrëveshjen e Parkut Inovativ të Prizrenit foli edhe Kryeministri Ramush Haradinaj, i cili e vlerësoi si misionin më të mirë dhe të dytin pas përkrahjes që Gjermania ka dhënë në vitin 1999, kur dërgoi trupat e saj paqeruajtëse në Kosovë.

“Ne u bëmë bashkë në vitin 1999, për ta sjellë paqen në vendin tonë, kur Gjermania për herë të parë në historinë e saj vendos t’i dërgoj trupat e saj paqeruajtëse në Kosovë dhe tani pas dy dekadave, në shërbim të paqes njerëz të vullnetit të mirë, iniciojnë hapin e radhës për prosperitetin e vendit, themelin e parkut inovativ dhe trajnues kosovaro- gjerman”, tha kryeministri Haradinaj.

Nga një fjalë rasti para të pranishmëve kanë mbajtur edhe Heike Backofen, përfaqësuese e Ministrisë Federale për Bashkëpunim Ekonomik dhe Zhvillim të Gjermanisë dhe ambasadori i Gjermanisë në Kosovë, Christian Heldt. /Infokusi/.

Udhëto Oslo – Prishtinë çdo javë me PrishtinaTickets

Sponsoruar

-Advertisement-