Ish-shefi i misionit të vëzhguesëve të OSBE-së në Kosovë, William Walker, ka qenë i ftuari i kësaj jave i emisionit “Infotalks”, prodhim i Gazeta Infokus.

Në këtë intervistë, ambasadori Walker ka folur gjerë e gjatë për angazhimin e tij në Kosovë.

Walker ka zbuluar disa nga prapaskenat e emërimit të tij, duke treguar se si Sllobodan Millosheviq e kishte pranuar me shumë kënaqësi angazhimin e Walker në Kosovë.

“Kur më thanë se OSBE-ja kishte pranuar nominimin tim nga Departamenti i Shtetit për të qenë kreu i Misionit të Verifikimit në Kosovë, më thanë se Millosheviqi e pranoi nominimin tim, sepse donte një amerikan dhe e donte Walkerin sepse mendonte se më njihte nga Kroacia. Ai mendonte se isha një mik i tij. Gazetari: Dhe me sa kam lexuar, ai ka menduar se ju do t’i mbroni serbët. Walker: Mendoj se ai mendonte se do të bëja atë që do të më thoshte ai të bëja. Millosheviqin, unë e përshkruaj atë në libër dhe e përshkruaj me përshkrime të ndryshme. Ai ishte një politikan i pastër, do të bënte gjithçka për të promovuar agjendën e tij politike, se ai ishte një kriminel që kishte bërë shumë para dhe do ta mbronte veten dhe shokët e tij që kishin bërë shumë para me të. Dua të them, lloj-lloj interpretimesh se kush ishte Sllobodan Millosheviq. Unë ende nuk e di se kush ishte ai”, tregon Walker.

“Ai e kishte atë ndjesinë që nëse të thoshte diçka, duhej ta pranoje atë si të vërtetë. Asnjë devijim. Më thoshte, Walker, po të them se shqiptarët nuk janë shumicë në Kosovë. Ju mund të keni dëgjuar Ëalker, se ka më shumë shqiptarë në Kosovë sesa komunitetet e tjera. Kjo është e gabuar. Dhe ai thjesht priste që unë t’i pranoj fjalët e tij, se kishte shumë miq shqiptarë, se po bënte gjithçka që mundej për çështjen shqiptare këtu. Gënjeshtra totale. Por gjithsesi”, kujton Ëalker.

Mirëpo, ajo që ambasadori Walker pa në teren ishte diçka krejt tjetër nga fjalët e Millosheviqit.

“Në Kosovë kam ardhur në mes të dimrit, si sot. Moti ishte shumë i ngjashëm me atë që është sot. I vranët, i ftohtë, pak borë në tokë. Pashë shumë mbeturina në rrugë, shumë qenë të egër që vraponin përreth. Dhe më kujtohet se mendoja, e dini, sapo kisha ardhur nga Beogradi, dhe, e dini, Beogradi është një qytet relativisht modern. Dhe mendova, ëoë, kjo pjesë e Serbisë, kjo krahinë e Serbisë, nuk duket se i kushtohet e njëjta vëmendje si pjesës tjetër të Serbisë. Dhe mendoja se ndoshta Beogradi nuk po kujdesej për Kosovën”, thekson ai.

Tronditjen më të madhe, Walker tregon se pësoi kur e pa atë që ndodhi në masakrën e Reçakut.

“E dini, dhe kam parë shumë skena dhune, por kjo ishte aq e përqendruar në një fshat, dhe burrat dhe djemtë ishin ekzekutuar brutalisht. Dhe na kishin thënë një natë më parë se kishte pasur një betejë në mes të UÇK-së dhe ushtrisë, se një numër që ishin vrarë ishin luftëtarë të UÇK-së. Asnjë ushtar serb apo polic nuk ishte vrarë, por 40 e diçka ushtarë të UÇK-së ishin vrarë. Dhe kur pashë trupat e një burri që ishte 99 vjeç. Ishte një djalë i ri 14 vjeç. Dhe këta padyshim se nuk ishin ushtarë. Këta ishin fshatarë. Këta ishin burra që u ngritën atë mëngjes duke menduar se do të dilnin në punë dhe në vend të kësaj u masakruan”, vazhdon tutje rrëfimin e tij William Walker.

Atë që ndodhi në Reçak, ish-shefi i OSBE-së në Kosovë e konsideron si një pikë kthese, që rriti vëmendjen e ndërkombëtarëve për atë që po ndodhte në Kosovë. /Gazeta Infokus

GP Aviation dhe PrishtinaTicket me fluturime direkte dy herë në javë drejt Parisit!

Sponsoruar