Ekonomi

Me Master e të papuna

Autori: Gazeta inFokus 21:33 | 07 March 2018

Në vendin më të varfër në rajon, që të gjesh punë nuk mjafton as diploma. Janë 194 gra që kanë diplomë master, e 4 mijë e 713 të tjera që kanë një diplomë bachelor, por që janë të papuna.

Diploma që kishin marrë pas studimeve, këtyre grave duket se po u shërben vetëm që të regjistrohen në listat e punëkërkuesve.

Janë 45 mijë e 61 gra me nivele të ndryshme shkollimi, që janë duke pritur për të gjetur një punë.

-Advertisement-

“Punëkërkuese e regjistruar në Kosovë – GRA: Pa kualifikuar- 18,691, Klasa I-IX (Shkolla Fillore)-10,319 , Arsim i mesëm profesional -10,308, Shkollë e mesme gjimnaz- 836, Bachelor- 4,713, Master -194”.

Kështu së paku thuhet në raportin “Raporti statistikor për punësimin e grave”, që ka publikuar Instituti GAP.

Sipas këtij raporti, edhe numri i grave që janë në pritje të një diplome del të jetë kogja i lartë.

“Numri i studentëve (bachelor dhe master) në universitet publike dhe kolegjet private: 60 mijë e 862 gra dhe 61 mijë e 62 burra”, thuhet në raportin e publikuar nga Instituti GAP.

Ani pse meshkujt që vijojnë studimet janë më shumë në numër , diplomat më shpejtë arrijnë t’i marrin femrat.

“Numri i studentëve të diplomuar në nivelin bachelor në vitin 2015-2016, në univeristetet publike 4,587 gra 2,636 burra”, thuhet më tej në këtë raport.

Ndryshe në Kosovë, shumica e të diplomuarve punojnë në profesione që nuk përkojnë fare me shkollimin e tyre. Kjo pasi që ka mungesë të vendeve të punës në profesionet përkatëse./Infokusi