Ekonomi

Ky është raporti ekskluziv që e çoi në shtëpi Bordin e Telekomit (Dokument)

Autori: Gazeta inFokus 17:01 | 19 February 2020

Asnjë skenar nuk e shpëton Telekomin e Kosovës nga falimentimi. Kështu e thotë raporti i performancës së ndërmarrjes publike Telekomi i Kosovës, në të cilin u bazua edhe kryeministri i Kosovës, Albin Kurti, kur vendosi ta shkarkoi bordin e kësaj ndërmarrjeje.

Gazeta inFokus ka siguruar një kopje të këtij raporti, i cili tregon se arsyeja kryesore e shkatërrimit të ndërmarrjes është numri i madh i të punësuarve pa ndonjë kriter dhe nevojë.

Raporti përfshinë periudhën e vitit 2018 dhe krahasimin me vitin 2017. Në bazë të të dhënave, shihet se deri në dhjetor të vitit 2018 numri i të punësuarve në Telekom ishte 2,289 punëtor, shkruan gazeta inFokus.

-Advertisement-

“Një kombinim i jo efikasitetit lidhur me numrat e fryrë të stafit dhe rritjes së konkurrencës nga operatori i dytë më i madh i telefonisë mobile në Kosovë IPKO, shihen si faktorët kryesorë që kontribuojnë në këtë përkeqësim të gjendjes financiare”, thuhet në raportin, i cili është i bazuar në raportin e auditimit të jashtëm dhe punës së vetë ndërmarrjes.

Të gjithë treguesit e profitabilitetit dhe rrezikut financiar sipas këtij dokumenti janë përkeqësuar nga viti 2013.

“Fitimet kanë rënë për 140 për qind gjatë kësaj periudhe, me humbje gjatë katër viteve të kaluara me radhë, gjë që teknikisht e definon këtë kompani si ekonomikisht të paqëndrueshme. Raporti i borxhit ndaj ekuitetit në vitin 2016 ka tejkaluar pragun prej 40 për qind dhe prej atëherë vetëm është përkeqësuar”, thuhet në raport.

Krejt kjo ka ardhur si rezultat i rritjes së pa kontrolluar të numrit të të punësuarve dhe kontratave të panevojshme për Telekomin, duke pamundësuar investimet e nevojshme për mirëmbajtjen dhe zhvillimin e ndërmarrjes dikur më profitabile në vend, shkruan gazeta inFokus.

“Rritja e kostove të stafit e pamundëson shpenzimin aq të nevojshëm në investime i cili do të mund të zvogëlonte kostot operative”, thuhet në raport për të cilin inFokus ka raportuar disa herë.

Një dështim i madh, i cili i atribuohet menaxhmentit të ndërmarrjes
“Telekomi i Kosovës”, në bazë të vlerësimit të performancës është edhe rënia e numrit të konsumatorëve.

Sipas raportit, edhe pse mbulueshmëria është e lartë, numri i konsumatorëve është në rënie.

“Ashtu siç shihet në tabelë, numri i konsumatorëve të telefonisë mobile për periudhën e vitit 2018 më i ulët se viti paraprak”, thuhet në raport./gazeta inFokus/

Subscribe në YouTube: GAZETA INFOKUSI
Kryetari Përparim Rama pjesë e ‘Mayor’s Talk’

Të tjera