Sport

Kabashi, me Barçën deri në vitin 2021. Klauzola e shitjes, nga 40 në 100 mln euro

Autori: Gazeta inFokus 07:14 | 21 February 2019

Sulmuesi kosovar Labinot Kabashi ka rinovuar edhe për dy vite të tjera kontratën me Barcelonën, teksa aktivizohet me të rinjtë e “La Masia”-s.

Prej shumë vitesh, talenti kosovar i lindur në Finlandë ka ëndërruar të ishte pjesë e skuadrës së madhe katalanase.

Rreth 10 vite më parë, Kabashi u bashkua me radhët e “Masia”-s, shkollës së famshme të futbollit të Barcelonës, pas një ekperience të mëparshme me Gimnastic apo Manresan.

-Advertisement-

Në moshën 16-vjeçare debutoi me të rinjtë e Barcelonës, e është grumbulluar edhe nga ekipet e moshave të Kombëtares së Kosovës.

Në hapat e tij të parë me fanellën e Barçës, ai shfaqej në fushat e Kosovës duke u shoqëruar nga i ati i tij, i cili mbetet pjesë e pandashme e karrierës së të birit, edhe pse nuk ishte dakord që në fillim për kalimin e tij te “Masia”.

Ndërkohë, aktualisht Kabashi ka rinovuar kontratën edhe për 2 vite të tjera, siç njofton faqja zyrtare e klubit të Barcelonës, me një klauzolë prej 40 milionë eurosh për shitje, ndërkohë që kjo klauzolë shkon deri në 100 milionë euro, në rast të aktivizimit të 19-vjeçarit edhe tek ekipi i parë.