Sport

Jo vetëm në kategorinë e saj – Distria i kalon të gjithë në botë

Autori: Gazeta inFokus 16:59 | 23 June 2025

Falë medaljes së argjendtë të fituar në Kampionatin Botëror të zhvilluar së fundmi në Budapest, Distria Krasniqi ka kapur kryesimin e listës botërore të xhudos.

Ajo tashmë mban totalin më të lartë të pikëve mes të gjitha xhudisteve dhe xhudistëve në glob.

Publikimi i renditjes së re u bë të hënën dhe, për shkak të rezultateve të kampionatit, renditjet kanë pësuar lëvizje të mëdha.

-Advertisement-

Në versionin e mëparshëm, kosovarja renditej e dyta në peshën –52 kg me 5 655 pikë, pas francezes Amandine Buchard, që kishte 5 700. Shtesa prej 1 400 pikësh nga medalja e fundit e ka çuar Krasniqin në kuotën 7 055, duke lënë Buchard në vendin e dytë.

Kampionia e re botërore, japonezja Uta Abe, ka kërcyer gjashtë pozicione dhe ndodhet e pesta me 4 352 pikë, pasi titulli i artë i solli 2 000 pikë bonus.

Renditja globale bazohet në rezultatet nga Grand Slamet, Grand Prix-të, Masters-et dhe kampionatet kontinentale, duke qenë thelbësore për normat olimpike dhe përcaktimin e bartësve në garat madhore.

Krasniqi nuk prin vetëm në kategorinë e saj: ajo është numri 1 edhe në renditjen e përgjithshme të femrave. Pas saj renditen francezja Romane Dicko (+78 kg) me 6 650 pikë dhe italiania Alice Bellandi (–78 kg) me 6 595. Madje, Distria ka më shumë pikë se çdo xhudist mashkull: rusi Inal Tasoev (7 000) dhe japonezi Sanshiro Murao (6 895) janë më poshtë në tabelë.

Në Budapest shkëlqeu edhe Laura Fazliu, që me bronzin në –63 kg u ngjit nga vendi i gjashtë në të tretin, ndërsa para saj mbeten kanadezja Catherine Beauchemin-Pinard dhe japonezja Haruka Kaju.

Arritjet e fundit e bëjnë Kosovën krenare: Distria Krasniqi jo vetëm kryeson botën në peshën e saj, por drejton klasifikimin absolut të xhudos, duke i lënë pas emrat më të spikatur të sportit.

Subscribe në YouTube: GAZETA INFOKUSI
Comodita Home nis epokën e franshizës në Belgjikë
-Advertisement-

Të tjera

Fokusi

sport