Kupa e Botës 2022

Gazetari amerikan e pyet futbollistin serb për skandalin me flamur, ky ishte reagimi i shpejtë nga zyrtari i Federatës serbe

Autori: Gazeta inFokus 18:20 | 26 November 2022

Serbët nuk kanë pranuar të flasin rreth shfaqjes së flamurit skandaloz në dhomën e tyre të zhveshjes nga ndeshja Brazil – Serbi, që u zhvillua të enjten mbrëma.

Në dhomën e Përfaqësueses së Serbisë u shfaq një flamur me ngjyrat e këtij shteti, si dhe hartën e Republikës së Kosovës në të, shkruan Gazeta Express.

Në këtë flamur ishte një mbishkrim ku thuhej “Nuk ka dorëzim”. Flamuri i njëjtë u shfaq edhe nga tifozët.

-Advertisement-

FIFA njoftoi këtë të shtunë se ka nisur tashmë hetimet, duke hapur procedurë disiplinore për Federatën e Futbollit të Serbisë.

Gjatë ditës të sotme Marko Grujic u paraqit në një konferencë për media, aty ku nuk shpëtoi pa u pyetur rreth rastit në fjalë.

Neil Barker, gazetari nga “Associated Press”, u interesua për rastin në fjalë, teksa provoi të merrte një koment nga Grujic. “Pse lojtarët zgjodhën ta vendosin atë flamur në dhomën e zhveshjes”, ishte pyetja e Barker.

Megjithatë, zyrtari për media nga Federata serbe, Milan Vukovic, reagoi menjëherë duke mos lejuar që mesfushori i Portos të përgjigjej.

Vukovic tha para gazetarëve se “do të diskutohet vetëm për duelin me Kamerunin”.

Gazetari amerikan e publikoi një video nga ky moment, teksa mes tjerash shkroi “Më vjen keq që lojtari nuk do t’i përgjigjet kësaj pyetjeje”.

Subscribe në YouTube: GAZETA INFOKUSI

Të tjera

Fokusi

kupa-e-botes-2022