Sport

Gani Sejdiu flet pas eliminimit të Gjilanit nga Kupa e Kosovës

Autori: Gazeta inFokus 18:17 | 10 February 2021

Gjilani të mërkurën në mesditë është mposhtur në udhëtim te Istogu me rezultat 2-0 dhe është eliminuar nga Kupa e Kosovës, shkruan Gazeta inFokus.

Disfata e gjilanasve nga Istogu ka qenë e papritur dhe befasi për një pjesë të madhe të opinionit sportiv në vendin tonë.

Humbjen e skuadrës së drejtuar nga Bylbyl Sokoli, për Gazetën inFokus e ka komentuar trajneri i njohur kosovar, Gani Sejdiu.

-Advertisement-

Gani Sejdiu: "Asaj që iu frikësuam, na doli"

Ai ka thënë se eliminimi i Gjilanit ka qenë befasi, sepse ata kanë pasur objektiv kryesor Kupën e Kosovës.

Tutje tekniku mitrovicas ka theksuar se Gjilani do të rikuperohet shpejtë nga kjo humbje.

“Po realisht është befasues eliminimi i Gjilanit, sepse Kupën e kanë pas objektivin kryesor dhe më të realizueshëm për të dalë në Evropë, por duhet qenë korrekt se në këto kompeticione jo vetëm tek ne ndodhin befasira, por edhe me klube të ligave më të forta evropiane. Një tjetër realitet është tash sa i përket klubeve të Ligës së Parë, sepse këtë vit ato kanë bërë një progres të madh sa i përket cilësisë dhe janë në një nivel krejtësisht tjetër në krahasim më të kaluarën. Gjilani me siguri nuk do të lejoj të trazohet, sepse edhe në kampionat kanë gjasa të zënë vendin e dytë, kështu që mendoj se do rikuperohen shpejt nga kjo humbje”, deklaroi Gani Sejdiu për Gazetën inFokus.

Pas kësaj disfate, Gjilani tashmë do të fokusohet në kampionat, kurse Istogu me këtë fitore ka kaluar në çerekfinale të Kupës së Kosovës./Gazeta inFokus/

Subscribe në YouTube: GAZETA INFOKUSI