Ekonomi

Dogana ka një lajmërim me rëndësi për rregullat e reja rreth automjeteve

Autori: Gazeta inFokus 17:31 | 29 December 2017

Dogana e Kosovës përmes një postimi në faqen e vet në Facebook, ka bërë një njoftim me interes rreth rregullave të reja për automjetet.

“Duke qenë se me 01 janar 2018 fillohet me zbatimin praktik të Ligjit për Automjete Nr.05/L-132, ju informojmë se duke filluar nga data 1 janar 2018 të gjitha veturat e kategorisë M1 më të vjetra se 10 vite dhe ato që nuk kanë motor të standardit euro 4 nuk mund të zhdoganohen në Republikën e Kosovës”, thuhet në njoftim.

Dogana njofton se me rastin e përcaktimit të vjetërsisë të merret për bazë viti i parë i regjistrimit i cili duhet të jetë brenda periudhës 01 janar – 31 dhjetor të vitit 2008.

-Advertisement-

“Kjo nënkupton se të gjitha automjetet të cilat janë regjistruar për herë të parë në këtë periudhë të Vitit 2008 dhe i plotësojnë kushtet për lirimin e gazrave sipas standardi të përcaktuar me EURO 4 mund të importohen në Kosovë. I vetmi institucion në Kosovë i cili ka mundësi për përcaktimin e nivelet të lirimit të gazrave është institucioni i autorizuar për homologim ‘Eurolab’”, thuhet më tutje në njoftim.

Kjo ndalesë nuk zbatohet në importin e:

1. Mjeteve motorike për transport të mallrave

2. Automjeteve të importuara në procedurë Importit të Përkohshëm (IM5),

3. Automjeteve për shfrytëzim nga misionet diplomatike (ligji nr. 03/l-033), dhe

4. Automjetet me vlerë muzeore (old timer).