Lajme

Del pozitiv me koronavirus mjeku që javën e kaluar i shtrëngoi duart me Putinin

Autori: Gazeta inFokus 17:33 | 31 March 2020

Një mjek që e kishte drejtuar presidentin rus, Vladimir Putin, nëpër dhomat e një spitali ku po trajtoheshin pacientët me koronavirus është diagnostikuar edhe vetë si i infektuar.

Denis Protsenko, kryemjek në spitalin “Kommunarka” të Moskës, doli pozitiv në testin për koronavirus të martën, raportoi televizioni shtetëror rus.

Putini u takua me këtë mjek të mërkurën e kaluar gjatë një vizite të papritur në spital, gjatë së cilës ai i vizitoi disa dhoma dhe bisedoi me stafin mjekësor dhe pacientët, shkruan “The Guardian”.

Gjatë vizitës, Protsenko është fotografuar duke i shtrënguar duart me presidentin rus, kanë qëndruar bashkë në një ashensor dhe asnjëri prej tyre nuk ka pasur maskë të vendosur gjatë takimit.

Nuk është e qartë nëse mjeku ka qenë i infektuar para se Putini të shkonte për vizitë në spital. Sidoqoftë, Kremlini tha se të gjithë personat që takohen me presidentin kontrollohen paraprakisht në aspektin shëndetësor.

Të tjera